(එෆ්.අස්ලම්)
දෙමළ ජනතාවගේ අයිතිවාසිකම් දිනා නොදුන් සිංහල දේශපාලන නායකයින්ට දෙමළ ජනතාවගේ ජාතික නායකයින් බවට පත්විය නොහැකි බවත්, දෙමළ ජනතාව පිළිගත් එකම ජාතික නායකයා එල්.ටී.ටී.ඊ නායක වේළුපිල්ලේ ප්‍රභාකරන් බවත් හිටපු උතුරු පළාත් කෘෂිකර්ම අමාත්‍ය පී.අයින්කරනේසන් මහතා පවසයි.

සිංහල දෙමළ ජනතාවගේ එකම ජාතික නායකයා එක්සත් ජාතික පක්ෂයේ නායක අගමැති රනිල් වික්‍රමසිංහ බවට අධ්‍යාපන රාජ්‍ය ඇමතිනී විජයකලා මහේෂ්වරන් විසින් කර ඇති ප්‍රකාශයක් සම්බන්ධයෙන් මාධ්‍ය වෙත අදහස් දක්වමින් අයින්කරනේසන් මහතා මේ බව අවධාරණය කළේය.

එහිදී වැඩිදුරටත් අදහස් දක්වා සිටි අයින්කරනේසන් මහතා මෙලෙසද සදහන් කර සිටියේය.

අප අතර දේශපාලන පක්ෂ රැසක් තියෙනවා.ඒ පක්ෂවල නායකයින් රැසක් සිටිනවා.නමුත් පක්ෂ නායකයින්ට ජාතික නායකයින් කියල කියන්න බැහැ.නිදහසින් පසු ඩී.එස්.සේනානායකගේ පටන් රනිල් වික්‍රමසිංහ, මෛත්‍රිපාල සිරිසේන දක්වාම බොහෝ නායකයින් හිටියා.ඒ අතරින් කවුරුන් හෝ නායකයෙකු දෙමළ ජනතාවගේ වාර්ගික අර්බුදයට විසදුම් දී තිබුණි නම් ඔහුට දෙමළ ජනතාවගේ ජාතික වීරයා බවට පත්වන්නට තිබුනා.

දෙමළ ජනතාව ගත්කල එල්.ටී.ටී.ඊ සංවිධානයේ නායක වේළුපිල්ලේ ප්‍රභාකරන් තමයි ඔවුන්ගේ ජාතික නායකයා.පක්ෂවල නායකයින් තමන් මූලිකත්වය ගැනිමේ ආශාවෙන් පසුවෙනවා.එහෙත් ප්‍රභාකරන් එහෙම හිතුවෙ නැහැ.එහෙම හිතුවනම් උතුරු නැගෙනහිර පළමු මහ ඇමතිවෙන්නෙත් ප්‍රභාකරන්.ඒ නිසා තමයි ඔහු සිටි කාලයේදීත් නොමැති කාලයේදීත් දෙමළ ජනතාවගේ ජාතික වීරයා බවට පත්ව සිටින්නේ යැයිද අයින්කරනේසන් මහතා සදහන් කළේය.