(විනීතා එම් ගමගේ)

ජනාධිපතිවරණයේ දී අපේක්ෂකයින් සිය ප‍්‍රචාරක කටයුතු වෙනුවෙන් කරන ලද වියදම්වලට සාපේක්ෂව මැතිවරණය අවසන් වනවිට ඔවුන් එක් ඡන්ද දායකයෙක් වෙනුවෙන් වියදම් කර ඇති මුදල් ප‍්‍රමාණය රුපියල් 969 ක් පමණ වනු ඇතැයි මැතිවරණ ප‍්‍රචණ්ඩ ක‍්‍රියා නිරික්ෂණ මධ්‍යස්ථානය කියයි.

මේ වනවිටත් ජනාධිපතිවණයේ දී එක් ඡන්ද දායකයකුට රුපියල් 625 ක් පමණ වියදම් කර ඇතැයි ගණනය කළ බව මැතිවරණ ප‍්‍රචණ්ඩ කි‍්‍රයා නිරික්ෂණ මධ්‍යස්ථානයේ ජාතික සම්බන්ධීකාරක මංජුල ගජනායක මහතා මෙසේ කීය.

කොළඹ 2 නිපොන් හෝටලයේ දී අද (13) පැවති මාධ්‍ය හමුවක දී ගජනායක මහතා මෙසේ ප‍්‍රකාශ කළේය.

අපේක්ෂකයන් මැතිවරණය වෙනුවෙන් මේ වනතෙක් වැයකර ඇති  මුදල් ගැන ගණනය කර මෙම නිරික්ෂණයට එළැඹී බවද ගජනායක මහතා පැවසීය.

අපේක්ෂකයන් වැය කර ඇති මුදල මේ වනවිට රුපියල් කෝටි 1000 ඉක්මවා ඇති බවත් එය මැතිවරණය අවසන් වනවිට රුපියල් කෝටි 1550 ක් දක්වා වැඩි වනු ඇති බවත් හෙතෙම කියා සිටියේය.

කෙසේ වෙතත් මේ මුදල් ලැබීමේ මූලාශ‍්‍ර මොනවාද යන්න සමහර විට සදාකාලික අභිරහසක් වනු ඇතැයි කී ගජනායක මහතා මේ තත්ත්වය මැතිවරණයක දී අපේක්ෂකයන් සියලූ දෙනාට තරගය වෙනුවෙන් වූ සමබිමක් ඇති නොවන බවත් මැතිවරණ වියදම් සීමා කිරීමේ නීති ගෙන එන්නැයි නිරික්ෂණ සංවිධාන බලකරන්නේ ඒ නිසා බවත් පැවසීය.

මීට අදාළව මේ වනවිට තොතුරු දැනගැනීමේ පනත යටතේ අයදුම්පත් 150 ක් පමණ මැතිවරණ ප‍්‍රචණ්ඩ ක‍්‍රියා නිරික්ෂණ මධ්‍යස්ථානය ඉදිරිපත් කර ඇතැයි ද හෙතෙම සඳහන් කළේය.

මේ සම්බන්ධව තවදුරටත් ක‍්‍රියාත්මක වන බවත් පක්ෂ උනන්දු නොවන්නේ නම් ඉදිරියේ දී පෞද්ගලික මන්ත‍්‍රී යෝජනාවක් ලෙසින් හෝ මෙය පාර්ලිමේන්තුවට ඉදිරිපත් කිරීමට  බලාපොරොත්තු වන බව ද ඔහු පැවසීය.