(ජයන්ත සමරකෝන්)

පාස්කු ඉරිදා සිද්ධිය සම්බන්ධයෙන් චෝදනා ලබා රිමාන්ඩ් බාරයට පත් කර සිටින හිටපු ආරක්ෂක ලේකම් හේමසිරි ප්‍රනාන්දු සහ හිටපු පොලිස්පති පූජිත් ජයසුන්දර යන මහත්වරු දෙදෙනා අද (09) සවස කොළඹ රිමාන්ඩ් බන්ධනාගාරය වෙත රැගෙන ඒමෙන් පසු එහි ලියාපදිංචි කර වැලිකඩ බන්ධනාගාර රෝහලට යාබදව පිහිටි විශේෂ ආරක්ෂක ස්ථානයක රඳවා ඇතැයි බන්ධනාගාර මූලස්ථාන ආරංචි මාර්ග අනාවරණය කරයි.

සැකකරුවන් දෙදෙනා බාරව ජේලර්වරයකු සහ සැරයන්වරයකු යොදවා සිටින බවද පැවසේ.

මෙම සැකකරුවන් රඳවා සිටින ස්ථානයේ මීට පෙර වැලිකඩ බන්ධනාගාරයේ සිරකරුවන් 27 දෙනෙකු ඝාතනය කිරීමේ සිද්ධිය සම්බන්ධයෙන් චෝදනා ලැබ සිටි බන්ධනාගාර කොමසාරිස් එමිල් රංජන් සහ පොලිස් පරීක්ෂක නියුමාල් රංගජීව යන මහත්වරුන් දෙදෙනා ද  රඳවා සිටි බවද දැනගැනීමට තිබේ.