දින නවයක මෙහෙයුමකින් පසු හෙරොයින් කිලෝග්‍රෑම් 100ක් සමඟ ශ්‍රී ලාංකිකයන් හය දෙනකු ඉන්දීය වෙරළ ආරක්ෂක බළකායේ අත්අඩංගුවට පත්ව ඇතැයි ඉන්දීය මාධ්‍ය වාර්තා කරයි.

ශ්‍රී ලංකා වෙරළ ආරක්ෂක බළකාය ලබාදුන් තොරතුරු අනුව ඉන්දීය වෙරළ ආරක්ෂක බළකාය ඉකුත් 17 වැනිදා මෙම මෙහෙයුම ආරම්භ කර ඇති අතර තූත්තුකුඩු දෙසට දකුණින් ගැඹුරු මුහුදේදී මෙම වැටළීම කර තිබේ.

බෝට්ටුවේ සිටි සියලු දෙනා ශ්‍රී ලාංකිකයන් බවත් මේ වනවිට ඔවුන් රඳවාගෙන ප්‍රශ්න කරන බවත් ඉන්දීය මාධ්‍ය වාර්තා කරයි.

පාකිස්තානයට අයත් යාත්‍රාවකින් මෙම හෙරොයින් තොගය ලැබුණු බවත් පාකිස්තානයේ කරච්චි නුවර සිට එම තොගය පැමිණි බවත් මුලින් කරන ලද ප්‍රශ්න කිරීම්වලදී අනාවරණය වී තිබේ. ඉන්දීය වෙරළාරක්ෂක බළකායේ අත්අඩංගුවට පත්ව තිබෙන යාත්‍රාවේ නම ‘‘ෂෙනායා දුව’’ බවත් හෙරොයින් පැකට් 99 ක්, මත්පෙති පැකට් 20 ක්, මිලිමීටර 9 වර්ගයේ පිස්තෝල පහක් ද එහි තිබී අත්අඩංගුවට ගෙන ඇත. ඊට අමතරව චන්ද්‍රික දුරකතන කට්ටලයක් ද එහි තිබී අත්අඩංගුවට ගෙන ඇත.

මීගමුවේ සිටින අලෙන්සු කුට්ටිගේ සිංහ දීප්ත සනි ප්‍රනාන්දු යන අයකුට මෙම ධීවර යාත්‍රාව අයත් බවත් ප්‍රශ්න කිරීම්වලදී අනාවරණය වී තිබේ.
 

 

055