(විනීතා එම් ගමගේ)             

මැතිවරණ ප්‍රචාරක කටයුතු අවසන් වූ දෙවැනිදා මධ්‍යම රාත්‍රියෙන් පසු අද (3) උදේ 9 වනතුරු ගතවූ පැය නමයේ දී සමාජ මාධ්‍යයන්හි පලවූ ප්‍රචාරක කටයුතු පිළිබඳ පැමිණිලි 940 ක් ලැබී ඇතැයි පැෆරල් සංවිධානය කියයි. 

මැතිවරණ  කොමිෂන්  සභාව විසින් අදාළ ආයතන වෙත කරන ලද දැනුම් දීම් අනුව මේ වනවිටත් එයින් 140 ක් ඉවත් කර ඇතැයි පැෆරල් විධායක අධ්‍යක්ෂ රෝහණ හෙට්ටිආරච්චි මහතා පැෆරල් ප්‍රධාන කාර්යාලයේ අද පැවති මාධ්‍ය හමුවක දී ප්‍රකාශ කළේය.

පූර්ව මැතිවරණ සමයේ ගතවූ මාස දෙක තුළ  මුහුණු පොතෙහි   මැතිවරණ  නීති උල්ලංඝනය කරමින් පලකිරිම් කරන ලද අවස්ථා 3444 ක් නිරික්ෂණය කළ බවද හෙට්ටිආරච්චි මහතා කීය.

එයින් අති බහුතරයක් මැතිවරණ නීති උල්ලංඝනය කරමින් කළ ක්‍රියාකාරකම් මුහුණු පොතෙහි පලකිරීම් යැයි ද හෙතෙම සඳහන් කළේය.

සෞඛ්‍ය නීති උල්ලංඝනය කරමින් මැතිවරණ ප්‍රචාරයන් සිදුකර ඒවා මුහුණු පොතෙහි දැමීම් 2483 ක් මෙම පැමිණිලි අතර වී යැයි  කී ඔහු එම පැමිණිලි අතර වෛරි ප්‍රකාශන 30 ක් ද වූ බව කියා සිටියේය.

කාන්තා අපේක්ෂිකාවන් හිංසනයට ලක්වන අන්දමේ පළකිරීම් ඇතුළු හිංසන 75 ක් හා වැරදි තොරතුරු පළ කිරීම් 45 ක් ද සොයා ගත්තේ යැයි හෙට්ටිආරච්චි මහතා පැවසීය.

පැෆරල් සංවිධානය මෙවර මැතිවරණ නිරික්ෂණයේ දී සමාජ මාධ්‍ය නිරික්ෂණයේ දී මෙම තොරතුරු හෙළි කරගත් බවත් ඉදිරියේ දී ඒවා පිළිබඳව අදාළ ආයතන දැනුවත් කිරීමට පියවර ගනනා බවත් ඔහු තවදුරටත් කියා සිටියේය.