(මනෝජ් හර්ෂික)

ශ්‍රී ලංකාව සහ ජපානය අතර ආරක්‍ෂක ගිවිසුමක් අත්සන් කිරීම සම්බන්ධයෙන් ජපානයේ අවධානය යොමු වී තිබෙන බව ජපාන විදේශ කටයුතු රාජ්‍ය අමාත්‍ය ටොෂිකෝ අබේ මහත්මිය ප්‍රකාශ කළාය. 

ගෝලීය ත්‍රස්තවාදයට මුහුණ දීම සඳහා ශ්‍රී ලංකාවට පූර්ණ සහය ලබා දීමට ජපානය සූදානම් බවත් ඒ සඳහා ආරක්ෂක ගිවිසුමක් අත්සන් කිරීම ජාත්‍යන්තර මට්ටමේ ත්‍රස්ත ක්‍රියා රටට කාන්දු වීම වළක්වාලීමේ වැදගත් පියවරක් වනු ඇති බවත් ටොෂිකෝ අබේ මහත්මිය අවධාරණය කළාය. 

ටොෂිකෝ අබේ මහත්මිය අද (12 වැනිදා) පෙරවරුවේදී ශ්‍රී ලංකා අග්‍රාමාත්‍ය රනිල් වික්‍රමසිංහ මහතා හමුවූ අවස්ථාවේදී මේ බව ප්‍රකාශ කර තිබේ. 

අගමැති වික්‍රමසිංහ මහතා සිංගප්පූරුව බලා පිටත්ව යාමට පෙර මෙම හමුව පැවැත්විණ. කොළඹ අරලියගහ මන්දිරයේ දී පැවති ද්විපාර්ශවික සාකච්ඡාවෙදී ටොෂිකෝ අබේ මහත්මිය අද (12) මේ පිළිබඳව පැවැසුවා ය.

ආරක්‍ෂක කටයුතු සම්බන්ධයෙන් ජපානය ලබා දෙන සහය සම්බන්ධව ශ්‍රී ලංකාවේ කෘතඥතාව පළ කරන බව අග්‍රාමාත්‍යවරයා එහිදී සඳහන් කළේය. 

ඉන්දියාව, මාලදිවයින හා ශ්‍රී ලංකාව එක්ව ක්‍රියාත්මක කිරීමට අපේක්‍ෂා කරන ප්‍රති ත්‍රස්ත සැලැස්ම සම්බන්ධයෙන් ඉන්දීය අග්‍රාමාත්‍ය නරේන්ද්‍ර මෝදි මහතා සමග පැවැත්වූ සාකච්ඡා සම්බන්ධයෙන් ද එහිදී වික්‍රමසිංහ මහතා කරුණු පැහැදිලි කළේය.

ශ්‍රී ලංකාවේ මාර්ග සංවර්ධනය ඇතුළු ක්ෂේත්‍ර කීපයක් සඳහාම ඉන්දියාව හා ජපානය සමග ඒකාබද්ධ සැලැස්මක් ක්‍රියාත්මක කරලීම සම්බන්ධයෙන් ද මෙහිදී අදහස් හුවමාරු කර ගැනිණි.

මෙම අවස්ථාවට ශ්‍රී ලංකාවේ ජපාන තානාපති අකිර සුගියාමා, තානාපති කාර්ය මණ්ඩල නිලධාරී ටකේෂි ඔසාකි සහ ජපාන විදේශ කටයුතු අමාත්‍යාංශයේ නිලධාරීන් වන ටකහිරෝ ෂියෝටා ටෙට්සුඕ කිටාඩා යන මහත්වරු සහභාගී වූහ.