(ඩයනා උදයංගනී)

උසස් පෙළ හා ශිෂ්‍යත්ව විභාග පවත්වන දින පිළිබඳ අවසන් තීරණය ලබන සතියේදී ගැනීමට නියමිත බව කැබිනට් ප්‍රකාශක තොරතුරු හා සන්නිවේදන තාක්‍ෂණ, උසස් අධ්‍යාපන, තාක්‍ෂණ හා නවෝත්පාදන අමාත්‍ය, ආචාර්ය බන්දුල ගුණවර්ධන මහතා  පැවසීය.

ලබන සතියේදී පාසල් ආරම්භ කිරීමෙන් පසු සිසුන්, පාසල් ගුරුවරුන් හා උපකාරක පන්ති පවත්වන ගුරුවරුන්, අධ්‍යාපනඥයන්, විභාග ක්‍රියාවලියට සම්බන්ධ ආචාර්ය මහාචාර්යවරුන් ආදී පාර්ශව සමඟ සාකච්ඡා කර විභාගය පැවැත්වීමට සුදුසු දිනය තීරණය කරන බව අධ්‍යාපන අමාත්‍ය ඩලස් අලහප්පෙරුම මහතා විසින් අමාත්‍ය මණ්ඩලයට දැනුම් දුන් බව ද කැබිනට් ප්‍රකාශකවරයා කීවේය.

දරුවන්ට විභාග සඳහා සූදානම්වීමට ප්‍රමාණවත් කාලයක් ලැබෙන පරිදි නිශ්චිත දිනයක් ඉදිරිපත් කරන්නැ මෙහිදී ජනාධිපතිවරයා අධ්‍යාපන අමාත්‍යවරයාට උපදෙස් දුන් බව ද බන්දුල ගුණවර්ධන මහතා සඳහන් කළේය.

ඇමති බන්දුල ගුණවර්ධන මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද(2) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

පෙරපාසල් සහ පළමු හා දෙවැනි ශ්‍රේණිවල සිසුන්ට පාසල් ආරම්භ කිරීම අගෝස්තු 10 වැනිදා තෙක් දීර්ඝ කර ඇත්තේ ඉතා කුඩා දරුවන්ට මුහුණු ආවරණ පැළඳවීම ඉතා අපහසු නිසා යැයිද බන්දුල ගුණවර්ධන මහතා කීවේය