(බිමල් ශ්‍යාමන් ජයසිංහ)

පොලිස් නිල ඇඳුමෙන් සැරසී ගිනි අවි පෙන්වා මරණීය තර්ජනය කර වත්තල රන් භාණ්ඩ අලෙවි සැලක හිමිකරුවෙක්ගෙන් රුපියල් තුන් කෝටි දහ අට ලක්ෂයකට අධික රන් භාණ්ඩ තොගයක් කොල්ලකෑමේ සිද්ධියට සම්බන්ධ හිටපු ගුවන් හමුදා සෙබලෙකු සහ තවත් පුද්ගලයෙකු මිනුවන්ගොඩ බුලුගහමුල ක්‍රීඩාංගනය අසලදී අද (020 අත්අඩංගුවට ගත්බව කොළඹ අපරාධ කොට්ඨාසය කියයි.

එම සැකකරුවන් දෙදෙනා සමඟ කොල්ලකෑ රන් භාණ්ඩ වලින් කොටසක් , කොල්ලයට හා ව්‍යාපාරිකයා පැහැර ගැනීමට යොදා ගත් මෝටර් රථය , ව්‍යාජ අංක තහඩු දෙකක් , ජංගම දුරකතන දෙකක් හා සිම්පත් දෙකක් පොලිසිය සොයාගෙන තිබේ.

ඉකුත් මස 15 වැනි දින ව්‍යාපාරිකයා රන් භාණ්ඩ වෙළඳ සැල වසා නිවස වෙත යමින් සිටියදී පොලිස් නිල ඇඳුමට සමාන ඇඳුමකින් සැරසී ගිනි අවි අතර දරා ගත් පුද්ගලයින් සිව් දෙනෙකු තමන් කොළඹ අපරාධ කොට්ඨාසයට අනියුක්ත නිලධාරීන් බව පවසා ව්‍යාපාරිකයාව පැහැරගෙන ගොස් තිබූ බව පොලිසිය කියයි.

අනතුරුව ව්‍යාපාරිකයාගේ මුහුණ හා දෑත් දෙපා රෙදි කඩකින් බැඳ ජා ඇල ප්‍රදේශයේ පාලු නිවසක රඳවා ඔහුට මරණීය තර්ජනය කරමින් බිය ගන්වා මෙම කොල්ලය සිදුකර තිබූ බව පොලිස් නිලධාරියෙකු පැවසීය.

අත්අඩංගුවට ගත් සැකකරුවන් දෙදෙනා වයස අවුරුදු 40 ත් 48 ත් වයස්වල පසුවන පුද්ගලයින් බව පොලිසිය පැවසීය.

මෙම කොල්ලකෑමට සම්බන්ධ අනිකුත් සැකකරුවන් හා කොල්ලකන ලද රන් භාණ්ඩ සොයා ගැනීම සඳහා කොළඹ අපරාධ කොට්ඨාසය පරීක්ෂණ සිදුකරන බවද පොලිසිය පැවසීය.