(එම් කේ නන්දසේන)

යාල ජාතික වනෝද්‍යානයේ සතුන් මරා විකුණන දඩයක්කරුවන් හතර දෙනෙකු  ජීප් රථයක් සහ දඩයම් කිරීමට යොදාගත් බව කියන බෝර දොළහ වර්ගයේ පතරොම් තුවක්කුවක් සමඟ අද (10) අත්අඩංගුවට ගත් බව තිස්සමහාරාම පොලිසිය කියයි.

යාල ජාතික වනෝද්‍යානයේ ඔන්ඩච්චි සංචාරක නිකේතනයට ඇසුනු වෙඩි ශබ්දයක් අනුව බැඹව වනජීවී කාර්යාලයේ නිලධාරීන් පිරිසක් විසින් බන්දුවැව ප්‍රදේශයේ දී මෙම සැකකරුවන් හතරදෙනා අත්අඩංගුවට ඇත.

වනජීවී නිලධාරීන් එම පිරිස පැමිණෙන මාර්ගයේ රැකවල්ලා සිටි බවත් සැකකරුවන් පැමිණි ජීප් රථය වනජීවී නිලධාරීන්ගේ අණ නොතකා පලා යාමට උත්සහ කළ බවත් පසුව වනජීවී නිලධාරීන්ට වෙඩි ප්‍රහාරයක් එල්ලකර සැකකරුවන් පලා ගිය බවත් වනජීවී නිලධාරීන් ද එම ජීප් රථයට වෙඩි තබා ඇති බවත් එම නිලධාරීහු පැවැසූහ.

සැකකරුවන් පලා ගිය ජීප් රථය තිස්සමහාරාම මහසෙන්පුර ප්‍රදේශයේ ගරාජයක තිබී සොයා ගෙන ඇති අතර වනජීවී නිලධාරීන්ට වෙඩි තැබූ බව කියන බෝර 12  වර්ගයේ තුවක්කුව රන්මිණි තැන්න ප්‍රදේශයේ සඟවා තිබියදී සොයා ගත් බව තිස්සමහාරාම පොලිසිය කීය.

මෙම පිරිස දඩයම් කරන ලද වන සතුන්ගේ මස් සොයා ගැනීම සඳහා වනජීවී නිලධාරීන් හා පොලිසිය පරීක්ෂණ අරම්භ කර ඇති බව තිස්සමහාරාම පොලිසිය පැවැසීය.