(ඉන්දිකා රාමනායක)

පාස්කු ඉරිදා  දින දේවස්ථාන තුනකට, තරුපහේ හෝටල් තුනකට හා  තවත් ස්ථාන දෙකකට  බෝම්බ ප‍්‍රහාර එල්ල කළ සියලූ බෝම්බකරුවන්ගේ  ඩී.එන්.ඒ  සැසදෙන බවට රජයේ රස පරීක්ෂකවරයා අද (21) තහවුරු කළ බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා  පැවසීය.
 
කොළඹ ෂැංගි‍්‍රලා හෝටලයට  බෝම්බ ප‍්‍රහාර දෙකක්  එල්ල වී ඇති අතර ඉන් එක්  බෝම්බයක් පුපුරවාගත් මොහොමඞ්  ඊබ‍්‍රාහිම්  ඉල්හාම් අහමඩ් නැමැත්තා සහ සිනමන් ග‍්‍රෑන්ඞ්  හෝටලයේ බෝම්බය පුපුරවාගත් මොහොමඞ්  ඊබාහිම්  ඉන්ෂාත්  අහමඩ්  නැමැති  සහෝදරයන් දෙදෙනාගෙන්  ඩී. එන් .ඒ  ඔවුන්ගේ පියා වන දැනට අපරාධ පරීක්ෂණ දෙපාර්තමේන්තු අත්අඩංගුවේ පසුවන මොහොමඩ් ඊබ‍්‍රාහිම් නැමැත්තාගේ. ඩී.එන්.ඒ සමඟ සැසදෙන බවට  තහවුරු කර ඇති  බව රුවන් ගුණසේකර මහතා කියා සිටියේය.
 
මීගමුව කටුවපිටිය  දේවස්ථානයට  බෝම්බ ප‍්‍රහාරය එල්ල කළ අච්චිමොහොම්මදු මොහොම්මදු  හස්තුන් නැමැත්තාගේ  ඩී.එන් ඒ ඔහුගේ දෙමාපියන්ගේ ඞී එන් ඒ සමග සැසදෙන බවට තහවුරු වී ඇති  බවද ගුණසේකර මහතා කියා සිටියේය.
 
කොච්චිකඩේ ශන්ත අන්තෝනි දේවස්ථානයට  ප‍්‍රහාර එල්ල කළ බෝම්බකරු වු   අලව්ඩීන් අහමඞ් මුවාත් නැමැත්තාගේ ඩී එන් ඒ ද ඔහුගේ දෙමාපියන්ගේ ඩී එන් ඒ සමග ගැලපෙන බවද හෙතෙම කීය. දෙහිවල  ලැගුම් හලක බෝම්බයක් පුපුරවාගත්  අබ්දුල් ලතීෆ්  ජමිල් මොහොමඩ් නැමැත්තාගේ ඩී එන් ඒ ඔහුගේ  දරුවාගේ ඞී එන් ඒ සමග ගැලපෙන බවද  තහවුරු වී ඇත.
 
මඩකලපුව සියෝන් දේවස්ථානයේ බෝම්බ පුපුරවාගත්  මොහොමඩ් නසාර් මොහොමඞ් අසාද් නැමැත්තාගේ ඩී එන් ඒ ඔහුගේ මවගේ ඩී එන්  ඒ සමග ගැලපෙන බවට තහවුරු වී ඇත.
 
කොළඹ කිංස්බරි හෝටලයේ බෝම්බකරු වන මොහොමඞ් අසාම්  මොහොමඞ්  මුබාරක්  නැමැත්තාගේ ඞී එන් ඒ ඔහුගේ  දරුවාගේ  ඞී එන් ඒ සමග ගැලපෙන බවට තහවුරු වු බවද රුවන් ගුණසේකර මහතා පැවසීය.
 
දෙමටගොඩ මහවිල උද්‍යානගේ නිවසක බෝම්බ පුපුරවාගෙත්  බෝම්බකාරිය වු  මොහොමඞ් ෆාතිමා ජිෆ්රි නැමැත්තිය ෂැංගි‍්‍රලා හෝටලයේ බෝම්බකරු වු  මොහොමඞ්  ඊබ‍්‍රාහිම් ඉල්හාම්  අහමඞ්  නැමැත්තාගේ බිරිද බවත්  බෝම්බ පුපුරවා ගැනීමෙන් දෙමටගොඩ නිවස තුළ මියගොස් සිටි දරුවන් තිදෙනා ඔවුන් දරුවන් බවටත් රජයේ රස පරික්ෂකවරයා  වැඩිදුරටත් තහවුරු කළ බවද රුවන් ගුණසේකර මහතා සදහන් කළේය.