(විජේරත්න රත්නායක)

පසුගියදා ජීවිත හානියක්ද සිදුවූ බදුල්ල නාරංගල කන්ද ආශ්‍රිත වනාන්තරය රක්ෂිතයක් ලෙස ගැසට් කර සංරක්ෂණය කළයුතු බවට යෝජනාවක් අද (05) සොරණාතොට ප්‍රාදේශීය සභාවේදී සභා සම්මත විය.
    
මේ සම්බන්ධයෙන් යෝජනාවක් සභාවට ඉදිරිපත් කළ එම ප්‍රාදේශීය සභාවේ එ.ජා.ප. මන්ත්‍රී  ප්‍රියන්ත විජිත බණ්ඩාර මහතා, මෙම කන්දට සංචාරකයින් පැමිණීම හේතුවෙන් පසුගියදා එහි සිදුවූ මරණය වැනි අනතුරුවලට අමතරව එම කන්දේ පාමුල පිහිටි ජල පෝෂක ප්‍රදේශ විනාශයට පත්වීම, කඳු මුදුනේ පොලිතින් ප්ලාස්ටික්, වීදුරු බෝතල් හා ටින් වර්ග ඇතුළු අපද්‍රව්‍ය බැහැර කිරීම, නීතිවිරෝධී මත්ද්‍රව්‍ය  භාවිතය හා වෙනත් අපචාර කටයුතු සිදුවීම, වනාන්තරයේ සත්ත්ව හා ශාක ප්‍රජාවට හානි සිදුවීම හා කඳුමුදුනේ කූඩාරම් ගැසීම හා ගිණිමැළ දැල්වීම හේතුවෙන් කඳුමුදුන පාංශුඛාදනයට ලක්වීම වැනි හානි රැසක් සිදුවන බව පෙන්වා දුන්නේය.

එබැවින් සුවිශේෂී වටිනාකම් රැසක් සහිත මෙම වනාන්තරය රක්ෂිතයක් ලෙස ගැසට් කර වනජීවි දෙපාර්තමේන්තුව යටතට පැවරීම සුදුසු බවට යෝජනා කළ ඒ මහතා, ඉන් අනතුරුව විශේෂයෙන් පාසල් සිසුන්, විශ්ව විද්‍යාල සිසුන්, පරිසරවේදීන් වැනි පිරිස්වලට අධ්‍යයන කටයුතු සඳහා පමණක් විශේෂ අවසරයක් හා අධීක්ෂණයක් යටතේ ඊට ඇතුළු වීමට අවසර දිය හැකි බවද පැවසීය.

සභාවේ මන්ත්‍රීවරුන් රැසක් මෙම යෝජනාවට සහයෝගය පලකරමින් අදහස් දැක්වූ අතර ඒකච්ඡන්දයෙන් සම්මත වූ එම යෝජනාව ඉදිරි බදුල්ල දිස්ත්‍රික් සම්බන්ධීකරණ කමිටුව වෙත යොමුකරන බව සොරණාතොට ප්‍රාදේශීය සභාවේ සභාපති නදීකා ප්‍රිශාන්ති දිසානායක මහත්මිය පැවසුවාය