නවසීලන්තයේ උතුරු දූපතට නැගෙනහිරින් සිව්වැනි වරටත් අද (5 වැනිදා) උදෑසන භුමිකම්පාවක් ඇතිවී තිබේ. එය රිච්ටර් මාපාංක 6.5 ක භූකම්පනයකි.

සුනාමි අනතුරු ඇඟවිම් මධ්‍යස්ථානය විසින් අනතුරු ඇඟවීම් නිකුත් කර තිබුණ ද පසුව එය ඉවත් කරගෙන ඇත. ඊට හේතුව වී ඇත්තේ දෙවැනි සහ තුන්වැනි භූමි කම්පා වඩාත් ප්‍රබල වූ නමුත් එයින් ඇතිවූ බලපෑම අපේක්ෂා කළ තරම් හානිදායක නොවීමයි.

කෙසේ වෙතත් ඕක්ලන්ඩ් නුවර ආසන්නයේ වෙරළබඩ ප්‍රදේශවල සිටින ජනතාවට ආරක්ෂිත ස්ථාන වෙත ගොස් අවධානයෙන් සිටින ලෙසත් නවසීලන්තයේ ජාතික හදිසි කළමනාකරණ ඒජන්සිය උපදෙස් නිකුත් කර තිබේ. මීට පෙර සුනාමි අනතුරු ඇඟවීමක් සිදු කළ අතර වෙරළට ඔබ්බෙන් තවත් භුමිකම්පා තුනක් වාර්තා වීමෙන් පසු නිවාස වලින් ඉවත්ව ආරක්ෂිත ස්ථාන කරා යන ලෙස නිවැසියන්ට පවසා තිබේ.

රිච්ටර් මාපාංක 7.3 ක භූ කම්පනයක් උතුරු දූපතට නැගෙනහිරින් වාර්තා වූ අතර ඊට තවත් පැය 4 කට පසු කර්මඩෙක් දූපත් අසළ තවත් රිච්ටර් මාපාංක 7.4 ක භූකම්පනයක් සිදුවිය. වඩාත්ම ප්‍රබල භූමිකම්පාව වන  රිච්ටර් මාපාංක 8.1 ක භූමි කම්පාව පෙරවරු 8.28 ට වාර්තා වූ අතර සිව්වැනි කම්පනය 6.5 ක විශාලත්වයකින් අද (5) පස්වරු 12.12 ට හට ගත්තේය.

සුනාමි අනතුරු ඇඟවීම් පස්වරු 2 න් පසු පහව යන අතර පසුව නිවෙස් වලින් ඉවත් වූවනට නැවත සිය නිවෙස් කරා යාමට හැකි බව සඳහන් කරයි.