(කාංචන කුමාර ආරියදාස)

දඹුල්ල ඉහළ ඇරෑවුල ගෝන වැව ප්‍රදේශයේ දී පුද්ගලයෙකු ඝාතනය කර ටයර් දමා පිලිස්සීමේ සිද්ධිය සම්බන්ධ බවට සැක කරන  පුද්ගලයන් 3 දෙනකු මාතලේ කොට්ඨාස අපරාධ අංශය මගින් සැකපිට අත්අඩංගුවට දඹුල්ල පොලිසියට භාරදී තිබේ.

පසුගිය 16 වන දින දඹුල්ල ඉහළ ඇරෑවුල ගෝන වැව ප්‍රදේශයේ වන ලැහැබක් තුළ ටයර්  දමා නාඳුනන අයෙකු පුළුස්සා ඇති බව පොලිසිය සොයා ගෙන තිබිණි.
 
ඒ අනුව මෙම සිද්ධිය සම්බන්ධයෙන් බොහෝ දෙනා අතර දැඩි කතාබහකට ලක්ව තිබිණි.
 
පොලිසිය අත්අඩංගුවට ගත්  පුද්ගලයින්ගෙන් ප්‍රශ්න කිරීම්වලදී හෙළි වී ඇත්තේ මෙසේ මියගොස් ඇත්තේ වැලි ටිපර් ‍රියදුරන්  ලෙස කටයුතු කළ කහවත්ත ප්‍රදේශයේ පුද්ගලයෙකු බවයි.
 
සිද්ධියට සම්බන්ධව අත්අඩංගුවට ගෙන ඇත්තේ ද තවත් වැලි ටිපර් හිමි කරුවන් තිදෙනෙකු බව පොලීසිය කියයි.
 
 ගෝන වැව ඉදිකිරීම් සඳහා වැලි සපයන පිරිසක් බව පොලීසිය කියයි .මියගිය වැලි ටිපර් කරුගේ බිරිඳ සමග අනියම් සබඳතාවක් පවත්වාගෙන යන  ප්‍රධාන සැකකරු බව පොලිස් ප්‍රශ්න කිරීම්වලදී හෙළි වී තිබේ.
 
මෙම පුද්ගලයා ඝාතනය කිරීම සඳහා අනෙක් සැකරුවන් දෙදෙනාගේ ද සහය ලබාගෙන ඇති බව පොලීසිය කියයි. මෙම පුද්ගලයා ඝාතනය කිරීමට දින කිහිපයකට ඉහත දී වෙනත් ටිපර් රථයක් හරහා පරණ ටයර් මෙම ස්ථානයට ගෙනවිත් දමා තිබෙන බවත් පසුව  16   දින ප්‍රධාන සැකකරු මියගිය පුද්ගලයා සමග දඹුල්ලට පැමිණ මත්පැන් සාදයක් පවත්වා උදැල්ලකින් ගෙල කපා ඝාතනය කර  පරණ ටයර් දමා ගිනි තැබූ බව සැකකරුගෙන් ප්‍රශ්න කිරීම්වලදී හෙළි වූ බව දඹුල්ල මුලස්ථාන පොලිස් පරීක්ෂක එස් ..පී .එදිරිසිංහ මහතා පැවසීය.
 
 සැකකරුවන් තවදුරටත් ප්‍රශ්න  කරමින් සිටින බවත් අධිකරණ නියෝගයක් ලබාගෙන ඉදිරියේදී තවදුරටත් සිද්ධිය සම්බන්ධයෙන් ප්‍රශ්න කරන බව පොලීසිය කියයි.