(බිඟුන් මේනක ගමගේ) 

ස්විඩන් ජාතික ඉවොන් ජොන්සන් නැමැති 19 හැවිරිදි තරුණිය ඝාතනය කිරිමේ චෝදනාවට වරදකරු වී ජීවිතාන්තය දක්වා සිර දඬුවම් විඳිමින් සිටි ජූඩ් ශ්‍රමන්ත ජයමහ නමැත්තාට ජනාධිපති සමාව දීම සම්බන්ධයෙන් සිරකරු අයිතිවාසිකම් සුරැකීමේ කමිටුව සියලුම ජනාධිපති අපේක්ෂකයන්ගෙන් ලිඛිතව තම මතය විමසා සිටින බව එහි සභාපති නීතිඥ සේනක පෙරේරා මහතා ‘ලංකාදීප’ යට අද (11) පැවැසීය.

ජුඞ් ශ්‍රමන්ත ජයමහ නමැති පුද්ගලයාට ජනාධිපති නිදහස ලබා දුන් ආකාරය මරණ දඬුවම හිමිවූවන්ට ජනාධිපති නිදහස ලබාදීමේ ක්‍රමයේ විනිවිදභාවය හා සාධාරණත්වය ගැන ප්‍රශ්න රැසක් මතුකරන බැවින් මෙසේ ජනාධිපති අපේක්ෂකයන්ගෙන් සිය අදහස විමසීමට කටයුතු කරන බව නීතිඥ පෙරේරා මහතා කීය.

ජනාධිපති මෛත්‍රිපාල සිරිසේන මහතා ගත් මෙම තීරණය සිරකරු අයිතිවාසිකම් සුරැකීමේ කමිටුව මුළුමනින්ම හෙළා දකින බව කී හෙතෙම ඊට එරෙහිව හෙට (12) වැලිකඩ බන්ධනාගාරය ඉදිරිපිට දී විරෝධතාවක් පවත්වන බව ද කීවේය. 

මරණ දඬුවම නියමවූවන්ට ජනපති සමාව දීම ඇත්තේ නීතිමය අක්‍රමිකතාවයකින් අසාධාරණයක් වුවහොත් භාවිතයට ගැනීමට වුවද ලංකාවේදී බලයට පත් සෑම ජනාධිපතිවරයකුම එම බලය අවභාවිත කළ බවට නීතිඥ සේනක පෙරේරා මහතා චෝදනා කළේය.

මරණ දඬුවමට ජනපති සමාව දෙන්නැයි ඉල්ලූ වයෝවෘද්ධ කාන්තාවක් ඇතුලු පිරිසක් සිටියදී මෙවැනි පුද්ගලයන්ට සමාව දෙන්නේ කවර පදනමකින්දැයි සිතාගත නොහැකි බවත් නීතිඥවරයා කීය.