(අජන්ත කුමාර අගලකඩ)

ආණ්ඩුවේ ඇතැමුන් සමඟ මත ගැටුම් තිබුණද ගත වූ වසර පහකට ආසන්න කාලය තුළ ජනතාව වෙනුවෙන් කටයුතු කරන්නට දැක්වූ සහය පිළිබඳව ජනාධිපති මෛත්‍රීපාල සිරිසේන මහතා අද (11) පැවැති අවසන් කැබිනට් රැස්වීමේදී  ඇමැති මණ්ඩලයට ස්තුතිය පළකර ඇත.

තමාගේ පාලන කාලය තුළ සාමාන්‍ය ජනතාවට එරෙහිව එක තුවක්කුවක් හෝ පත්තු වී නැතැයිද රට තුළ මානව නිදහස හා මාධ්‍ය නිදහස තහවුරු කරන්නට හැකිවී යැයිද ජනාධිපතිවරයා එහිදී ප්‍රකාශ කර ඇත.

මෛත්‍රීපාල සිරිසේන මහතා ජනාධිපතිවරයා ලෙස සහභාගි වූ අවසන් කැබිනට් රැස්වීම ජනාධිපති ලේකම් කාර්යාලයේදී අද පස්වරුවේ පැවැත්විණි.

සාධාරණ හා නිදහස් මැතිවරණයක් පවත්වන්නට තමාට හැකි වූ බව පවසා ඇති ජනාධිපතිවරයා ඉදිරි දික කිහිපයද ඒ වෙනුවෙන් කැපවන බව සඳහන් කර ඇත.

තමාගේ වසර 5 කට ආසන්න කාලය තුළ රටට ජයග්‍රහණ රැසක් හිමිකර දුන් බව පවසා ඇති ජනාධිපතිවරයා ඒ සඳහා සහය දුන් ඇමැති මණ්ඩලයට ස්තුතිය පළ කර ඇත.

එහිදී අදහස් දක්වා ඇති අග්‍රාමාත්‍ය රනිල් වික්‍රමසිංහ මහතා විශ්‍රාම යන ජනාධිපතිවරයාට සුබ පැතුම් එක්කර ඇත.

මෛත්‍රීපාල සිරිසේන මහතා රටතුඵ ප්‍රජාතන්ත්‍රවාදය හා නිදහස ආරක්ෂා කරන්නට කැපවූ නායකයෙකු බව පවසා ඇති අගමැතිවරයා මත ගැටුම් තිබුණද එකට කටයුතු කරමින් ජනතාවගේ නිදහස ආරක්ෂා කරන්නට ජනාධිපතිවරයා කැපවූ බව පවසා ඇත.

එහිදී අදහස් දැක්වූ සෞඛ්‍ය ඇමැති රාජිත සේනාරත්න මහතා මෛත්‍රීපාල සිරිසේන මහතා ජනාධිපතිධූරයට පත්වීමෙන් රට තුළ ප්‍රජාතන්ත්‍රවාදය හා මානව නිදහස තහවුරු වූ බව සඳහන් කර තිබේ.

මහනගර හා බස්නාහිර සංවර්ධන ඇමැති පාඨලි චම්පික රණවක මහතා අදහස් දක්වමින් මෛත්‍රීපාල සිරිසේන මහතා ජනාධිපති ලෙස කටයුතු කළ දින 1800 ක කාල සීමාව තුළ ආණ්ඩු විරෝධී ක්‍රියා 3000 ක් පමණ සිදු වූ නමුත් ඒවාට එරෙහිව එක තුවක්කුවක් හෝ පත්තු වී නැතැයි සඳහන් කර ඇත.

මාධ්‍ය නිදහස ජනතාවගේ නිදහස ආරක්ෂා කරමින් නිදහස් හා සාධාරණ මැතිවරණයක් පවත්වන්නට ජනාධිපතිවරයාට හැකි වූ බවද ඇමැති රණවක මහතා පවසා ඇත.

තවත් ඇමැතිවරුන් කිහිපදෙනෙකු ද ජනාධිපතිවරයාට සුබ පතමින් එහිදී අදහස් දක්වා ඇත.