(මංගල  එදිරිසිංහ)

ඉංගිරිය, බොරළුගොඩ කර්මාන්තපුරයේ පිහිටි කර්මාන්ත ශාලා 5 කින් ආසාදිතයින් 20 දෙනෙකු හමුවීමෙන් අනතුරුව කර්මාන්තශාලා 3ක් තාවකාලිකව වසාදමා ඒවායේ සේවකයින් 435 දෙනෙකු ස්වයං නිරෝධායනයට ලක්කළ බව ඉංගිරිය සෞඛ්‍ය වෛද්‍ය නිලධාරි කාර්යාලයේ පරිපාලන මහජන සෞඛ්‍ය පරීක්‍ෂක එල්.පී.එල්. ප්‍රියන්ත මහතා පවසයි.


කර්මාන්ත ශාලා ආශ්‍රිතව සිදුකරනු ලබන අහඹු පීසීආර් පරීක්‍ෂණවල ප්‍රතිඵල ඊයේ (15) ලැබුණු අතර ඉන් සේවකයින් 20 දෙනෙකු මෙලෙස කොරෝනා ආසාදිත බව තහවුරු වී ඇත. මෙයින් ආසාදිතයින් 7 දෙනෙකු පමණක් ඉංගිරිය බල ප්‍රදේශයේ පදිංචිකරුවන් වන අතර එක් අයෙකු හොරණ සෞඛ්‍ය වෛද්‍යනිලධාරි කොට්ඨාසයේ ද, ඉතිරි 11දෙනා ලංකාවේ විවිධ ප්‍රදේශවල පදිංචිකරුවෝ වෙති.

මෙම ආසාදිතයින්ගේ සමීපතම ආශ්‍රිතයින් 200 දෙනෙකු සඳහා අද (16) පීසීආර් පරීක්‍ෂණ සිදුකිරීමට නියමිත අතර කර්මාන්තශාලා මට්ටමින් ද, පිසීආර් පරීක්‍ෂණ සිදුකිරීමට කටයුතු යොදා ඇත.

මේ අනුව ඉංගිරිය සෞඛ්‍ය වෛද්‍ය නිලධාරී බල ප්‍රදේශයේ කොරෝනා ආසාදිතයින් 236 දක්වා ඉහළ ගොස් ඇති අතර තවමත් වැඩිම ආසාදිතයින් හමුව ඇත්තේ පෝරුවදණ්ඩ මහජන සෞඛ්‍ය පරීක්‍ෂක කොට්ඨාශයෙනි.

ඉංගිරිය සෞඛ්‍ය වෛද්‍ය නිලධාරී වෛද්‍ය හර්ෂණි වීරසිංහ මහත්මියගේ මෙහෙයවීම සහ අධීක්‍ෂණය යටතේ තවදුරටත් පිසීආර් පරීක්‍ෂණ සිදුකරන බව ඉංගිරිය පරිපාලන මහජන සෞඛ්‍ය පරීක්‍ෂක එල්.පී.එල්. ප්‍රියන්ත මහතා වැඩිදුරටත් පවසයි.