(තරිඳු ජයවර්ධන,ජයන්ත සමරකෝන්,බිගුන් මේනක ගමගේ, නිමල කොඩිතුවක්කු සහ  රංජිත් රාජපක්ෂ)

හිටපු අමාත්‍ය ඒස්.බී දිසානායක මහතාගේ ආරක්ෂකයන් කළ ‌වෙඩි තැබීමකින් තුවාල ලැබූ ‌දෙදෙනෙකු අද (06) කරවනැල්ල රෝහලට ඇතුළත් කළ බව ජ්‍යෙෂ්ඨ පොලිස් අධිකාරී රුවන් ගුණසේකර මහතා පැවසීය.

වෙඩි තැබීමකින් ගිනිගත්හේන, පොල්පිටිය ප‍්‍රදේශයේදී පුද්ගලයින් දෙදෙනෙකු තුවාල ලබා රෝහල් ගත කළ බවද පොලිස් මාධ්‍ය ප‍්‍රකාශකවරයා සඳහන් කළේය.

මෙම වෙඩි තැබීම අද රාත්‍රී 8.30 ට පමණ සිදුවී ඇති බවත් තුවාල ලැබූවන් කරවනැල්ල හා කිතුල්ගල තැලිගම යන රෝහල්වලට  ඇතුළත් කර ඇති බවත් ගුණසේකර මහතා සඳහන් කළේය.

පාර්ලිමේන්තු මන්ත්‍රී එස්.බි. දිසානායක මහතා අද රාත්‍රීයේ දේශපාලන රැස්වීමකට සහභාගී වීම සඳහා  ගමන් කරමින් සිටියදී මෙම  අවහිර කිරීම සිදුව ඇති බවත් එහිදී ඇතිවූ බහින් බස් වීමක් දුර දිග යාමෙන් පසු  මන්ත්‍රීවරයාගේ ආරක්ෂකයින් මෙම වෙඩි තැබීම සිදුකර ඇති බවත්  පොලිස් මාධ්‍ය ප‍්‍රකාශකවරයා පැවැසීය.

ගැටුමට මැදිවූ මෙම පිරිස විවාහ මංගල්‍ය උත්සවයකට සහභාගී වී පැමිණෙමින් සිටියදී මෙම ගැටුම සිදුව ඇති බවත් වාර්තා වේ.

වෙඩි තැබීමෙන් පසු පාර්ලිමේන්තු මන්ත්‍රී එස්.බි. දිසානායක මහතා රැගත් රථ පෙළ එම ස්ථානයෙන් පිටව ගොස් ඇතැයි වැඩිදුරටත් වාර්තා වේ.

මේ සම්බන්ධයෙන් කළ විමසීමකදී කරවනැල්ල මූලික රෝහලේ අධ්‍යක්ෂ වෛද්‍ය දිනුක චන්ද්‍රසේන මහතා පැවසුවේ වෙඩි තැබීමෙන් තුවාල ලැබූ එක් රෝගියෙකු එම රෝහලට ඇතුලත් කළ බවත් ඔහුගේ තත්ත්වය බරපතල නොවන බවත්ය.

ඔහුගේ කකුලේ වලලුකර ප‍්‍රදේශයට වෙඩි තැබීමෙන් තුවාල සිදු වී ඇති බවත් රෝහල් අධ්‍යක්ෂවරයා වැඩිදුරටත් පැවැසීය.

සිද්ධිය සම්බන්ධයෙන් ගිනිගත්හේන පොලිසියේ ස්ථානාධිපති ඩී.ජී එස් කරුණාදාස මහතාගේ උපදෙස් මත විශේෂ පොලිස් කණ්ඩායමක් මේ පිළිබඳ වැඩිදුර විමර්ශන සිදුකරයි.