(ක.ග.කරුණාරත්න)

මඩකලපුව සිට කොළඹ බලා ධාවනය වෙමින් තිබූ මීනගයා නගරාන්තර දුම්රියට අද (10) රාත්‍රී 10.15 ට පමණ පූනානී සහ වැලිකන්ද දුම්රිය ස්ථාන අතර පුල්ලෙයාර්අඩි ප‍්‍රදේශයේදී වන අලි රංචුවක් හැපීම නිසා දුම්රිය පීලිපැන ඇතැයි වැලිකන්ද පොලිසිය කියයි.

දුම්රියේ හැපුණු එක් අලියෙකු එහි  එන්ජිම කොටසේ සිරවී සිටින බවද පොලිසිය සඳහන් කළේය.ඒ මළ සිරුර ඉවත් කර දුම්රිය නැවත පීලි ගතකිරීමට දුම්රිය දෙපාර්තමේන්තුව කටයුතු කරමින් සිටින අතර ඒ සඳහා දැඩි පරිශ‍්‍රමයක් දැරීමට සිදුව ඇතැයි එහි නිලධාරියෙකු කීය.

අලි රංචුව දුම්රියේ ගැටීමෙන් පසු තුවාල ලැබූ අලින් කිහිප දෙනෙකු වනයට පලාගොස් තිබෙන බව වැලිකන්ද වනජීවී කාර්යාලයේ නිලධාරීහු පැවැසූහ.

වන අලින්ගේ සුප‍්‍රකට ගමන් මාර්ගයක් වන මේ ස්ථානයේදී පසුගිය වසරේද දුම්රියේ ගැටී වන අලි පස් දෙනෙකු මරුමුවට පත්වූ බවද වනජීවී නිලධාරීහු කීහ.

ඡායාරූප - නිමල් ජයරත්න