(ප්‍රියානි මංගලිකා)

වැල්ලව පොලිස් වසමේ කැකුලාවල ප්‍රදේශයේ තම  බුලත් කොරටුවක වැඩ කරමින් සිටියදී මී ගවයකු එළවා එළවා ඇනීමෙන් තුවාල ලැබූ කාන්තාවක සහ ඇයගේ දියණිය රෝහලට ගෙන යෑමට ඉදිරිපත් වූ ලොරි රථ රියැදුරකු වූ 44 හැවිරිදි දෙදරු පියකු එම මී ගවයා ඇනීමෙන් මියගොස් තිබේ.

මෙම සිද්ධියෙන් මියගොස් ඇත්තේ කැකුලාවල ප්‍රදේශයේ පදිංචිව සිටි දෙදරු පියකු වන පී. ඒ. ප්‍රියන්ත රුවන් කුමාර නැමැත්තෙකි.

මී ගවයාගේ පහර කෑමෙන් බේරීමට මව සහ දියණිය අසල තිබූ පාළු නිවසකට ඇතුළු වී දොර වසා ගත්තද මී ගවයා නිවසේ දොරට පහරදී ඇතැයි පොලිසිය කළ විමර්ශනවලදී අනාවරණය වී ඇත. තුවාල ලබා සිටි මව සහ දියණිය රෝහල් ගෙන යෑමට අසල්වැසියන් උත්සාහ කළ අවස්ථාවේදී ඔවුන් රැගෙන යෑමට පැමිණි කුඩා ලොරි රථයේ රියැදුරුට ද මී ගවයා ඇන ඇති  බව පොලිසිය පවසයි.

රියැදුරු මී ගවයා  දැදුරු ඔය ජලාශය දෙසට පන්නා දැමීමට ගිය අවස්ථාවේදී අසල්වාසීන්  මව සහ දියණිය ලොරියට නංවා ඇතත් රියැදුරු නොපැමිණීම නිසා සොයා බැලීමේදී ඔහු මී ගවයාගේ පහර කෑමට ලක්ව බුලත් කොරටුවේම වැටී සිට ඇතැයි ද අනතුරුව ඔවුන් තිදෙනාම රෝහල් ගත කර ඇතැයි ද  පොලිසිය කියයි.

මී ගව ප්‍රහාරයට ලක්වූ රියැදුරා කුරුණෑගල මහ රෝහලට ඇතුළත් කරන විටද මියගොස් සිට ඇති අතර මීගව ප්‍රහාරයෙන් තුවාල ලැබූ මව සහ දියණිය රෝහලේ ප්‍රතිකාර ලබමින් සිටින බවද රෝහල්  ආරංචි මාර්ග සඳහන් කරයි.

මෙම මී ගවයා මීට පෙරද කීප දෙනකුට පරදීමට  උත්සහ කර ඇති අතර ඇද වැටුණු එක් අයකු​ගේ අතක්  බිඳී ඇති  බවද පැවසේ.  

සතුන් ඇති කිරීම පිළිබඳව කිසිදු විද්‍යාත්මක දැනීමක් හෝ පළපුරුද්දක් නැති ගවයාගේ  හිමිකරු මෙම මී ගවයා සුරතලයට මෙන් නිවස තුළම හදාවඩා ගෙන ඇති බවද  පරීක්ෂණවලදී අනාවරණය වී ඇත.