(මනෝප‍්‍රිය ගුණසේකර සහ රන්ජන් කටුගම්පොළ)

මාර්ග සංවර්ධන කටයුතු සඳහා ගෙවීමට රුපියල් මිලියන 75ක මුදලක් අවශ්‍ය බව කියමින් දිනයක් රහිත ලිපියක් මුදල් අමාත්‍ය රවී කරුණානායක මහතා මහා බැංකුවේ අධිපතිවරයාට යවා ඇතැයි බැදුම්කර කොමිසම හමුවේ සාක්කි දෙමින් මහා භාන්ඩාගාරයේ  මෙහෙයුම් අධක්‍ෂක ජනරාල් (විශ‍්‍රාමික) එම්.එස්.ඞී. රණසිරි මහතා පැවසීය.

මුදල් ප‍්‍රවාහ ප්‍රකාශයේ සඳහන් මුදලට අමතරව තවත් රුපියල් මිලියන 75ක මුදලක් අවශ්‍ය බව මහා භාණ්ඩාගාරයේ අධ්‍යක්‍ෂක ජනරාල්වරයා ලෙස කිසිවෙක් හෝ තමාට දැනුම් දුන්නේ නැතැයිද ඒ මහතා කීවේය. 

කොමිසමේ කටයුතු සඳහා පෙනී සිටින ජ්‍යෙෂ්ඨ නියෝජ්‍ය සොලිස්ටර් ජනරාල් ප‍්‍රියන්ත නාවාන මහතාගේ මෙහෙයවීම යටතේ රණසිරි මහතා අද (18) සාක්කි දෙමින් සිටියදී ඔහු වෙත ලිපියක් ඉදිරිපත් කරමින් කළ ප‍්‍රශ්න කිරීම් වලදී ඒ මහතා මේ බව හෙළි කළේය.

ප්‍රශ්නය. මෙම ලිපිය ලියා ඇත්තේ කාටද?

පිළිතුර.මහා බැංකුවේ අධිපතිවරයාට.

ප්‍රශ්නය. මෙම ලිපියේ සඳහන් වී ඇත්තේ මොනවාද?

පිළිතුර.2015 පෙබරවාරී මස 26 වැනිදා අමාත්‍යවරුන් වන කබීර් හෂීම්, මලික් සමරවික‍්‍රම සහ රවී කරුණානායක මහතා එවකට හිටපු මහා බැංකු අධිපතිවරයා සමඟ රැස්වීමක් පැවැත්වු බවත් එම රැස්වීමේදී රුපියල් බිලියන 75ක මුදලක් මාසයක් කාලයක් ඇතුළත ලබා දෙන ලෙසත් සඳහන් වී තියෙනවා.

ප්‍රශ්නය. එලෙස මුදල් අවශ්‍ය වී ඇත්තේ කුමන කාරණාවකටද?

පිළිතුර.මාර්ග සංවර්ධන කටයුතු සඳහා මුදල් ගෙවීමටයි.

ප්‍රශ්නය. එම ලිපියේ දිනයක් යොදා තියෙනවද?

පිළිතුර. නැහැ.

ප්‍රශ්නය. 2015 පෙබරවාරී මාසයේදී මෙම ලිපිය ගැන ඔබට දැනගැනීමට ඔබට ලැබුණද?

පිළිතුර.නැහැ. 2015 පෙබරවාරී මාසයෙන් පසුව අවස්ථාවක හෝ මෙම ලිපිය ගැන මට දැනගැනීමට හැකියාවක් ලැබුණේ නැහැ.

ප්‍රශ්නය. මහා භාන්ඩාගාරයේ අධ්‍යක්‍ෂක ජනරාල්වරයා ලෙස ඔබගේ මුදල් ප‍්‍රවාහ ප‍්‍රකාශයේ සඳහන් මුදලට අමතරව තවත් රුපියල් මිලියන 75ක මුදලක් අවශ්‍ය බව කිසිවෙක් හෝ ඔබට දැනුම් දුන්නාද?

පිළිතුර.නැහැ.

ප්‍රශ්නය. රජයට මුදල් අවශ්‍ය නම් ඒ ගැන දැනුම් දිය යුත්තේ කාටද?

පිළිතුර. මහා භාන්ඩාගාරයට.

ප්‍රශ්නය. ඉන් පසුව සිදුවන්නේ කුමක්ද?

පිළිතුර. මේ සම්බන්ධයෙන් අපි මහා බැංකුවේ නිලධාරීන් සමඟ සාකච්ඡාවක් පවත්වා මෙම මුදල් ලබා දීමට පියවර ගන්නවා.

ප්‍රශ්නය. මහා භාන්ඩාගාරයේ අනුමැතියකින් තොරව මෙතරම් විශාල මුදලක් ඉල්ලූ අවස්ථාවක් පිළිබඳ ඔබගේ සේවා කාලයේදී අසා තියෙනවද?

පිළිතුර. නැහැ. මාගේ සේවා කාලයේ කිසිම දිනෙක මහා භාන්ඩාගාරයේ අනුමැතියකින් තොරව මෙතරම් මුදලක් ඉල්ලූ බව මා අසා නැහැ.

ප්‍රශ්නය. රජයේ මෙම මුදල් අවශ්‍යතාවය පිළිබඳව මුදල් අමාත්‍යංශයෙන් හෝ මහා බැංකුවෙන් හෝ මහා භාන්ඩාගාරයට දැනගැනීමට ලැබුණද?

පිළිතුර.නැහැ. රජයට මුදල් අවශ්‍ය වුණොත් මට හෝ නියෝජ්‍ය ලේකම්වරයාට දැනුම් දිය යුතුයි. නමුත් එහෙම දැනුම් දීමක් සිදුවුණේ නැහැ.

වැඩිදුර සාක්කි විමසීම සිදු කෙරේ.