තරුණ සිනමා අධ්‍යක්ෂවරයෙකු වන සංජීව පුෂ්පකුමාර අධ්‍යක්ෂණය කළ දැවෙන විහඟුන් චිත්‍රපටය (Burning Birds) 40 වැනි ගොතන්බර්ග් අන්තර්ජාතික සිනමා උලෙළේ (Göteborg Film Festival) ඉංග්මාර් බර්ග්මාන් සම්මානය සඳහා වන තරඟකාරී අංශයට තේරී පත් වී තිබේ. ස්වීඩනයේ ගොතන්බර්ග්නුවරදී එළඹෙන 27 වැනිදා සිට පෙබරවාරි 06 වැනිදා දක්වා පැවැත්වෙන ස්කැන්ඩිනේවියානු කලාපයේ ප්‍රධානතම සිනමා උලෙළදවන ගොතන්බර්ග් අන්තර්ජාතික සිනමා උළෙලේ "ඉංග්මාර් බර්ග්මාන් සම්මානය" සඳහා නිර්දේශවූ පළමු ශ්‍රී ලාංකික සිනමා කෘතිය වන්නේද "දැවෙන විහඟුන්" චිත්‍රපටයයි.

මේ අතර, දැවෙන විහඟුන් චිත්‍රපටය46 වැනි අන්තර්ජාතික රොටර්ඩෑම් සිනමා උලෙළේ "දීප්තිමත් අනාගතයක් සහිත සිනමාකරුවා" තරග අංශයටදතෝරාගෙන තිබේ. එම සිනමා උළෙල අනිද්දා(25දා) සිට පෙබරවාරි 05වැනිදා දක්වා නෙදර්ලන්තයේ රොටර්ඩෑම් නුවරදී පැවැත්වේ.දැවෙන විහඟුන් චිත්‍රපටයේ පළමු යුරෝපීය සිනමා උලෙළ නියෝජනය රොඩර්ඩෑම් සිනමා උළෙලින් ඇරඹෙන අතර, සංජීවගේ ප්‍රථම සිනමා කෘතිය වන ඉගිලෙන මාළුවෝ (Flying Fish) සිනමා නිර්මාණයද2011 වර්ෂයේදී මෙම සම්මාන උලෙළ නියෝජනය කිරීමට සමත්විය.

පසුගිය ඔක්තෝබර් මස පැවැති 21 වැනි බුසාන්අන්තර්ජාතික සිනමා උලෙළේ තරගකාරී අංශයසඳහා තේරුණු දැවෙන විහඟුන් චිත්‍රපටය, 17 වැනි ටෝකියෝ ෆිල්ම්එක්ස් අන්තර්ජාතික සිනමා උ‍ලෙළේදී ජූරියේ සුවිශේෂ සම්මානය දෙවැනි ස්ථානයද දිනාගත්තේය.

මහේන්ද්‍ර පෙරේරා, සමනලී ෆොන්සේකා, අනෝමා ජනාදරී, චාන්දනී සෙනවිරත්න, ලියෝනි කොතලාවල, ශ්‍යාම් ප්‍රනාන්දු, දසුන් පතිරණ, පුබුදු චතුරංග, ධර්මප්‍රිය ඩයස්, තිස්ස බණ්ඩාරනායක, ප්‍රියංකා සමරවීර, දර්ශන් ධර්මරාජ්, සංජීව දිසානායක ඇතුළු පිරිස රංගනයෙන් දායකවන දැවෙන විහඟුන් චිත්‍රපටය සංජීව පුෂ්පකුමාරගේ දෙවැනි වෘත්තාන්ත චිත්‍රපටයයි.

සමිත් බෝධිපක්ෂ