(අජිත්ලාල් ශාන්තඋදය)

සුමන සමන් දෙව්රුවක් සහ දේවාභරණ වලින් කොටසක් පළමුවරට සිරිපා මලූවට පළමුවරට වැඩම කරවීමට නියමිත කුරුවිට එරත්න සිරිපා මාර්ගයේ 2019/2020 වන්දනා වාරය වෙනුවෙන් වන්දනාකරුවන්ගේ පහසුකම් ඉහළ නැංවීමට කටයුතු යොදා ඇති බැවින් සුරංගනාවියන් සිරිපා මලූවට මල්රැගෙන ගිය මාවත ඔස්සේ  සිරිපා කරුණා කරන්න එන්නැයි කුරුවිට ප‍්‍රාදේශීය ලේකම් දිළිණි ධර්මදාස මහත්මිය ආරාධනා කරන්නීය.

සිරිපා වන්දනාවාරය ආරම්භ කරමින් පැල්මඩුල්ල ගල්පොත්තාවල ශ‍්‍රීපාස රජමහා විහාරස්ථානයේ තැන්පත් කර ඇති සුමන සමන් දේවප‍්‍රතිමා සහ දේවාභරණ මාර්ග හතරක් ඔස්සේ සිරිපා මලූවට වැඩම කරවීමට ශ‍්‍රීපාදස්ථානාධිපති බෙංගමුවේ ධම්මදින්න හිමියෝ අනුමැතිය දුන්හ.

ඒ අනුව දේව ප‍්‍රතිමාවක් සහ දේවාභරණ කොටසක් මලූව කරා සිරිපා වන්දනාවේ යන ප‍්‍රධාන මාර්ගයක් වූ කුරුවිට එරත්න මාර්ගය ඔස්සේ මෙවර සිට වැඩම කරවනු ලබයි.

ගල්පොත්තාවල ශ‍්‍රීපාද රජමහා විහාරයේ සිට ශ‍්‍රීපලාබද්දල මාර්ගය ඔස්සේ ගමන්ගන්නා පෙරහර සමග එක්ව සබරගමු මහ සමන් දේවාලය වෙත පැමිණෙන පෙරහර මහ සමන් දේවාලයේ දී පෙරහර දෙකක් ලෙස  වෙන්ව කුරුවිට සහ රත්නපුර මාර්ග ඔස්සේ ගමන් කිරිමට නියමිතය.

කුරුවිට එරත්න මාර්ගය ඔස්සේ ගමන් කිරිමට නියමිත සිරිපා පෙරහර රත්නපුර පානදුර පාරේ කහන්ගම හරහා ගොරකඇල හන්දියට ගොස් ගොරකඇල හන්දියෙන් හල්පේ, පාතගම, කුරුවිට නගරයට පැමිණ, කුරුවිට නගරයෙන් එරත්න පාරේ එක්නැළිගොඩ, සූදාගල, බටතොට, ලස්සකන්ද, ගඟබඩ, අඩවිකන්ද, කැකුණහින්න හරහා වර්ණගල තෙක් ගමන් කරයි.

වර්ණගල සිට දෝලාවක තැන්පත් කර බැතිබතුන්ගේ කර මතින් දේව ප‍්‍රතිමාව සිරිපා මල්ව කරා වැඩම කරවීමට නියමිතය. කැකුණහින්න තෙක් රිය පෙරහරේ ගමන් ගන්නා වාහනවලට යාහැකි නමුත් එතැන් සිට වර්ණගල දක්වා ඇති කොටසේ ගමන් ගන්නේ දේවප‍්‍රතිමා සහ දේවාභරණ තැන්පත් කර ඇති රථයත්, තවත් රථ දෙකක් පමණක් බවට සීමාකර ඇත්තේ මාර්ගයේ පටු බව නිසා ඇතිවන වාහන තදබදය වැළැක්වීමටය.

මෙම පෙරහර ගමන් මාර්ගයේ ග‍්‍රාමසේවා වසම් 14ක් පසුකරයි. රත්නපුර සහ කිරිඇල්ල ප‍්‍රාදේශීය ලේකම් කොට්ඨාසවල වසම් දෙක බැගින් හතරක් පසුකරයි. ඉතිරි ග‍්‍රාමසේවා වසම් දහයම කුරුවිට ප‍්‍රාදේශීය ලේකම් කොට්ඨාසයට අයත්ය. පෙරහර ඇතුලූවන විට වසම්වල ග‍්‍රාම නිලධාරීන් ප‍්‍රමුඛ වසමේ  විහාරස්ථානවල දායක සභා, දහම්පාසල්, පෙරපාසල් ආදිය නියෝජනය කරමින් විශේෂ පිළිගැනීම් සංවිධායක කර තිබේ.

සෑම වසමක පෙරහරේ ගමන් ගන්නා බැතිමතුන් වෙනුවෙන් දන්සැල් පවත්වන්නට ද ප්‍රදේශවාසීහු සුදානමින් සිටිති.

‘වසර දෙකක කාලයක ඉ`දලා සිරිපා වන්දනා වාරයේ බැතිමතුන්ගේ මූලික අවශ්‍යතා හැකි පමණින් සපුරාලන්න අපි කටයුතු කරමින් ඉන්නවා. දිස්ත‍්‍රික් ලේකම් මාලනී ලොකුපෝතාගම මහත්මියත් ඊට විශාල අනුග‍්‍රහයක් ලබා දෙනවා. මේවනවිට එරත්න මාර්ගයේ පොදු වැසිකිළි 16ක් අපි සකස් කරලා තියනවා. වර්ණගල, සීතගඟුල, ඉඳිකටුපාන අම්බලන් පිළිසකර කරලා තියනවා. සමහර ඒවායේ වැඩ නිමකරන්න තියනවා.’

‘පාගමින් වන්දනා ගමන් අරඹන ස්ථානයේ සිට බැතිමතුන් දැනුවත් කරන දැන්වීම් පුවරු අපි සකසලා තියනවා. අම්බලන්වලට ඇති දුර, අනතුරුදායක තැන්, ආදිය එසේ සටහන් කරලා තිබනවා. ඒ වගේම සිරිපා ගමනේ අතිශය පාරිසරික සංවේදී කලාප ඇතුළත් මාර්ගයක් ලෙස  එරත්න මාර්ගය හදුන්වන්න පුලූවන්. ප‍්‍රදේශයට, ලංකාවට අවේනික ශාඛ සහ සතත්ව ප‍්‍රජාවන් සිටින ප‍්‍රදේශ ඔස්සේ මේ සිරිපා මාර්ගය වැටී තියෙන්නේ. ස්වභාවික දිය උල්පත් හැම තැනම තියනවා. පානීය ජල ගැටලූ නෑ. පරිසරයට ආදරය කරන පරිසරය විදගෙන වන්දනාවේ යන්න හොඳම පාර මේක වෙන්නැති. අපි පිට පළාත්වල සැදැහැවතුන්ට ආරාධනා කරනවා එරත්න පාරෙන් එක පාරක් ඇවිත් යන්න කියලා. ඊට පස්සේ හැම වාරයකම එන්න හිතේවි.’ ප‍්‍රාදේශීය ලේකම්වරිය පොදු ආරාධනාවක් කළාය.

කොළඹ රත්නපුර මාර්ගයේ කොළඹ සිට කිලෝමිටර් 87ක දුරින් කුරුවිට නගරය පිහිටා තිබේ. උඳුවප් පුන් පොහොයෙන් සිරිපා වන්දනා වාරය ආරම්භ වූ පසු කුරුවිට සිට අඩවිකන්ද හරහා කැකුණහින් තෙක් පොදු මගී ප‍්‍රවාහන සේවා පහසුකම් සැපයීමට ලංගම සහ පෞද්ගලික බස් සේවා ස්ථාපිත කෙරේ. කැකුණහින්නේ සිට මලූව කරා යායුත්තේ පාගමිනිනි.

පොලිස් මුරපොළක් වර්ණගල ස්ථාපිත කර ඇත. පොලිතීන් සහ ප්ලාස්ක සිරිපා අඩවියට ගෙන නොයන ලෙස ප‍්‍රාදේශීය ලේකම්වරිය කාරුණික ඉල්ලීමක් කරන්නීය.

මෙවරත් සමන් දෙවි පෙරහරේ මුද්‍රිත මාධ්‍ය දායත්වය විජය පුවත්පත් සමාගම විසිනි.