(මොරගොල්ලාගම සිසිර කැලේගම)
මනාපයක් ලබා ගැනීම සඳහා අතරමංව සිටි තැනැත්තකු ඡන්ද පොළට රැගෙන යන අතරතුරේදී ඔහු විරුද්ධ පාක්ෂිකයකු බව දැනගෙන හෙතෙම අතරමග දමා යාමේ පුවතක් ඇතුගල්පුරවරයෙන් වාර්තාවේ. 


සිද්ධිය මෙසේය. 


පොල්ගහවෙල ප්‍රදේශයේ සිට ගල්ගමුව මැතිවරණ කොට්ඨාසයට ඡන්දය දැමීම සඳහා පිරිසක් ඔවුන් සතු පුද්ගලික වෑන් රථයකින් ඊයේ (05) පෙරවරුවේදී පැමිණෙමින් සිටියහ. ඒ අවස්ථාවේදී කුරුණෑගල නගරයේ බස් රථයක් නොමැතිව තම ගම්බිම් බලා යාමට නොහැකිව අතරමංව සිටි තැනැත්තකු මොවුනගේ නෙත ගැටී ඇත.  තමාට... ගමට යාමට අවශ්‍ය නමුත් බසයක් නොමැති බව හෙතෙම ඔවුනට පැවසීය. 


‘‘අපිත් යන්නේ ගල්ගමුව ප්‍රදේශයට එහෙනම් ඔයාටත් යන්න පුළුවන්’’ සැබෑ මිනිසුන් ලෙස පිහිට වී ඔහු වෑන් රථයට නංවාගෙන පැමිණෙමින් සිටි අතරවාරයේ රටේ තත්ත්වය හා ඡන්ද උණුසුම ගැන ඔවුන් කතා කරමින් පැමිණියේය.  


වෑන් රථයේ පිරිස... ‘‘අහවල් අපේක්‍ෂකයා නම් අපිට ඇස් දෙකට පේන්න බැහැ’’ යනුවෙන් පවසා තිබේ. ඒ සමගම අතරමංව සිට එහි නැගී එන තැනැත්තා ද 
‘‘මටත් එයා නම් පෙන්නන්න බැහැ. මමවත් අපේ ගෙදර එකෙක්වත් ඔය අපේක්ෂකයාට නම් ඡන්දයක් දෙන්නේ නැහැ.’’ යනුවෙන් පෙරළා පිළිතුරු දී තිබේ.  ඒ සමගම වෑන් රථයෙන් පැමිණි පිරිස මුහුණෙන් මුහුණ බලාගෙන ටික දුරක් නිසොල්මන්ව ඉදිරියට විත් වෑන් රථය නවතා ඇත. 


‘‘මහත්තයෝ අපි මෙතනින් යන්නේ ඔයා බහිනවාද. කරුණාකර වෙනත් වාහනයක යන්න’’ කියා රැගෙන ආ තැනැත්තා බස්සවා විකල්ප මාවතක් ඔස්සේ වෑන් රථය ඉදිරියට ගොස් ඇත. එම පිරිස... අහවල් අපේක්‍ෂකයා හොඳ නැති බව පවසා ඇත්තේ මෙම තැනැත්තාගේ හිත බලන්නට බවත්, එම පිරිස එකී අපේක්‍ෂකයාගේ ඥාති පාර්ශ්වයක් නිසා සිත් තැවුලට පත්ව මෙම තැනැත්තා අතරමග දමා නික්ම ගොස් ඇති බවත් පසුව දැන ගන්නට ලැබී තිබේ.