(කාංචන කුමාර ආරියදාස)

ත්‍රිකුණාමලය දිස්ත්‍රික්කයේ කින්නියා ප්‍රදේශයේ වගා කෙරුණු සීමිත මුරුංගා අස්වැන්නට දඹුල්ල ආර්ථික මධ්‍යස්ථානයේ දී කිලෝවකට රුපියල් 125 සිට රුපියල් 150 දක්වා ඉහළ මිල අද (26) ලැබිණි.

දිවයිනේ බොහෝ ප්‍රදේශවල මුරුංගා වගා කර ද මේ දිනවල මුරුංගා අස්වැන්න කින්නියා ප්‍රදේශයේ පමණක් ලැබීම නිසාවෙන් ලැබෙන සීමිත මුරුංගාවල සඳහා විශාල ඉල්ලුමක් පවතී .

ඒ අනුව දඹුල්ල ආර්ථික මධ්‍යස්ථානයේ අද 26 දින ලැබුණු සීමිත මුරුංගා කිලෝව රුපියල් 125 සිට රුපියල් 150 දක්වා වූ ඉහළ තොග මිලක් යටතේ අලෙවි වූ බවත් එම මුරුංගා තොග සිල්ලර වෙළෙඳ පොළේ කිලෝවක් රුපියල් 300 ට වඩා වැඩි මිල ගණන් යටතේ අලෙවි වන බව පාරිභෝගිකයෝ පවසති.

එක මුරුංගා කරලක් රුපියල් 30 ක පමණ වටිනාකමකින් යුත් තොග මිල පැවති බව දඔුලු වෙළෙන්දෝ කියති.

ඉතා සාර්ථක මුරුංගා අස්වැන්නක් කින්නියා ප්‍රදේශයේ මේ දිනවල ලැබෙන බවත් අනෙකුත් ප්‍රදේශ වල මුරුංගා මේ දිනවල මල් හට ගෙන තිබෙන බවද තව දින 15 -20 ත් පමණ ගත වෙද්දී දිවයිනේ විවිධ ප්‍රදේශවලින් මුරුංගා අස්වනු වෙළඳපොලට ලැබෙනු ඇතැයි ව්‍යාපාරිකයෝ පෙන්වා දෙති.