(ඩබ් ඒ පියතිලක)

පොළොන්නරුවේ අලෙවිසල්වල බිත්තරයක සිල්ලර මිල අද (17) වන විට රුපියල් 22 ත් රුපියල් 24 ත් අතර මිලකට ඉහළ ගොස් ඇති බව පාරිභොගික ජනතාව කියති. ඇතැම් ප්‍රදේශවල බිත්තරයක මිල රුපියල් 25 දක්වා ඉහළ ගොස් ඇත.
 
බිත්තර වෙළඳුන් පවසා සිටින්නේ කෝවිඩ් ව්‍යාප්තිය ආරම්භ වූ ඉකුත් මාර්තු මාසයේ මුල වන විට බිත්තරයක සිල්ලර මිල රුපියල් 10 ත් 12 ත් අතර මිලක පැවතිණි.
 
කෙසේවෙතත් බිත්තර මිල අප්‍රේල් මාසයේ රුපියල් 15 ක්, මැයි මාසයේදී රුපියල් 17 ක්, ජුනි මාසයේ රුපියල් 18 ක්, ජුලි මාසයේ රුපියල් 20 දක්වාත් මිල ඉහළ යාමෙන් පසු අද වනවිට රුපියල් 23.50 දක්වා අඛණ්ඩ මිල වැඩිවීමක් පෙන්නුම් කර තිබේ. ලංකාවේ දෛනික බිත්තර පරිභෝජනය ලක්ෂ 85 ක් පමණ වන අතර මේ වනවිට එය 30% කින් පමණ පහළ බැස ඇත.
 
කොවිඩ්  ව්‍යාප්තියෙන් පසු කුකුළු ගොවිපොළවල සතුන් ඇති කිරීම ප්‍රමාණාත්මකව අඩු වීම, යුරෝපයෙන්, අමෙරිකාවෙන් සහ ඉන්දියාවෙන් මව් සතුන් ආනයනය ඇනහිටීම මෙන්ම සත්ව ආහාර සඳහා සහල් භාවිත කිරීමට පැනවූ තහනම හේතුවෙන් දේශීයව සත්ව ආහාරවල මිල ඉහළ යාම මෙලෙස බිත්තර මිල ඉහළ යාම කෙරෙහි බල පා තිබේ. කෙසේවෙතත් සත්ව ආහාර අමුද්‍රව්‍යවල මිල  ඉහළ යෑම හේතුවෙන් බිත්තර මිල නිෂ්පාදකයින් විසින් ඉහළ දමා ඇති බව වෙළෙන්ඳෝ පවසති.
 
කොරෝනා වයිරසය ව්‍යාප්තවෙමින් පැවති පසුගිය කාලයේදී මාර්ග දෙපස වෙළෙන්ඳන් ඉතා අඩු මිලට බිත්තර අලෙවි කළ බවත්, අවදානම ඉවත්වීමත් සමග බිත්තර මිලත් ඉහළ ගිය බව පාරිභොගික ජනතාව කියති.