අධික වර්ෂාවෙන් ඇතිවූ ගංවතුර හා නාය යෑම් හේතුවෙන් ජපානයේ දකුණු දිග කියුෂු දූපතේ 15 දෙනකු මියගොස් 09 දෙනකු අතුරුදන්ව තිබේ.

සාත්තු නිවාසයක් ගංවතුරට යටවීමෙන් 14දෙනකු මියගොස් ඇති අතර අනෙක් තැනැත්තා නාය යෑමකට හසුවී මියගොස් ඇත.

 කුමාමොටෝ සහ කගොෂිමා ප්‍රාන්ත වලට අයහපත් කාලගුණික තත්ත්වය හේතුවෙන් දැඩි හානි සිදුවී තිබේ.

දූපතේ 200,000කට වැඩි පිරිසකට ආරක්ෂිත ස්ථාන කරා ඉවත් වීමට නියෝග දී ඇති බව බලධාරීහු පවසති.

කුමා ගඟ හරහා තිබූ පාලමක් ගසාගෙන ගොස් ඇති අතර නිවාස සහ රථ වාහන ජලයෙන් යටවී ඇති බව වාර්තා කර තිබේ.

කාළගුණ විද්‍යා අංශ පවසන්නේ තද වැසි තවත් දින කිහිපයක් පවතිනු ඇති බවයි.  මෙවැනි වර්ෂාපතනයක් මීට පෙර කිසිදිනක කළාපයේ ඇතිවී නොමැති බව ද ඔවුහු පවසති.

අනතුරුදායක තත්ත්වය පහව යන තුරු උපරිම විමසිල්ලෙන් සිටින ලෙස අග්‍රාමාත්‍ය ෂින්සෝ අබේ ජනතාවගෙන් ඉල්ලා ඇත.

(බීබීසී ඇසුරිණි - 085)