(මනෝප්‍රිය ගුණසේකර)

කුරුණෑගල විල්බාව ප්‍රදේශයේ ඉදිකරමින් පවතින ජාත්‍යයන්තර පාසලේ අධ්‍යාපනය ලබන දරුවන්ට ආරක්‍ෂිත තත්වයක් ඇද්ද? යන්න පිළිබඳ වහාම විමර්ශනයක් කර බලන ලෙස කුරුණෑගල මහෙස්ත්‍රාත් බන්ධුල ගුණරත්න මහතා අධ්‍යාපන අමාත්‍යංශයේ ලේකම්වරයාට නියම කළේය.

කුරුණෑගල විල්බාව ප්‍රදේශයේ ඉදිකරමින් පවතින අදාළ ජාත්‍යයන්තර පාසල් වැඩබිමක නවාතැන්ගෙන සිටි පෙදරේරූවරයකු පිළිස්සී මියගොස් ඇතැයි කියමින් කුරුණෑගල මුලස්ථාන පොලිස් පරීක්‍ෂක පුෂ්පලාල් මහතා කළ ඉල්ලීමක් පිළිගනිමින් එලෙස නියම කළ කුරුණෑගල මහෙස්ත්‍රාත්වරයා සිද්ධිය වු ආකාරය හෙළි කර ගැනීම සඳහා වහාම විමර්ශන කරන ලෙස කුරුණෑගල විදුලි අධිකාරීවරයාට රජයේ රස පරීක්‍ෂවරයාට” පොලිස් අපරාධ ස්ථාන විමර්ශන (සොකෝ) නිලධාරීන්ට සහ අධිකරණ වෛද්‍ය නිලධාරීවරයාට නියම කළේය.

සිද්ධියෙන් මියගොස් ඇත්තේ අදාළ ජාත්‍යයන්තර පාසල් වැඩබිමේ නවාතැන්ගෙන සිටි පෙදරේරූවරයකු වු නුගලියද්ද තලාතුඔය පදිංචි ප්‍රියශාන්ත පෙරේරා නමැත්තෙකි.

දුරකථන ඇමතුමක් මඟින් ලැබුණු තොරතුරකට අනුව සිද්ධිය සම්බන්ධයෙන් විමර්ශන ආරම්භ කළ කුරුණෑගල පොලිසියේ නිලධාරීහු සිද්ධියට අදාළව කළ විමර්ශන වල ප්‍රගතිය දැනුම් දෙමින් පසුගිය 20 වැනිදා රාත්‍රී 11-20ට පමණ අදාළ ජාත්‍යයන්තර පාසැල් වැඩබිමේ විදුලිය විසන්ධි වීමත් සමඟ ගින්නක් හයගෙන ඇතැයි සඳහන් කළේය.

එම ගින්නට හසුවී අදාළ ජාත්‍යයන්තර පාසැල් වැඩබිමේ නවාතැන් ගෙන සිටි පෙදරේරූවරයකු වු ප්‍රියශාන්ත පෙරේරා නමැත්තා හඳුනාගත නොහැකි වන තරමටම පිළිස්සී මිගගොස් ඇතැයි දැනුම් දුන් නිලධාරීහු මෙම ගින්න හටගැනීමට හේතූ වු කරුණු පිළිබඳ වහාම විමර්ශනයක් කරන ලෙස කුරුණෑගල විදුලි අධිකාරීවරයාට” රජයේ රස පරීක්‍ෂවරයාට සහ පොලිස් අපරාධ ස්ථාන විමර්ශන (සොකෝ) නිලධාරීන්ට නියම කරන්නැයිද මරණකරු සම්බන්ධයෙන් ප්‍රශ්චාත් මරණ පරීක්‍ෂයක් කරණ ලෙස කුරූකෑගල අධිකරණ වෛද්‍ය නිලධාරීවරයාට නියම කරන්නැයිද ඉල්ලා සිටියේය.