ඉත්තෑවකු ගොදුරු කර ගැනීමට ගොස් දරුණු ප්රහාරයකට ගොදුරු වූ කොටියකු තම සිරුරේ ඇනී ඇති ඉත්තෑකූරු අසීරුවෙන් ඉවත්කරගන්නා ආකාරය කැමරාවේ සටහන් කරගැනීමට ඡායාරූප ශිල්පියෙක් සමත්ව සිටියි.
හෙල්ගාඩ් විලියිර්ස් නමැති ඔහු මේ ඡායාරූප ගෙන ඇත්තේ දකුණු අප්රිකාවේ කෘගර් ජාතික වනෝද්යානයේ දී ය.
ඉවසීමට නොහැකි අධික කුස ගින්න හේතුවෙන් ම මේ දරුණු කොටියා වැරදි සතකු ගොදුර කර ගැනීමට යන්න ඇතැයි ඔහු පවසයි. තමන් කොටියා දකින අවස්ථාවේ ඔහුගේ මුහුණ පුරාත් සිරුරේ ස්ථාන රැසකත් ඉත්තෑ කූරු ඇතුලට කිඳා බැස තිබූ බව ද ඡායාරූප ගත් විලියර්ස් පවසයි.
‘‘ මම එය දැක පුදුම වුණා. කොටියා දරුණු තුවාල වලින් දීර්ඝ කාලයක් පීඩා විදිනු ඇතැයි සිතුවා. නමුත් ඌ තම ඉදිරි ගාත්රා, පිටුපස ගාත්රා හා කටත් දිවත් උඵයෝගී කරගනිමින් මේ ඉත්තෑකූරු එකිනෙක ගලවා ගත්තා. බිම පෙරළෙමින්. තණ කොළ හා වෙනත් ගස්වල ඉත්තෑ කූරු පටලවමින් ඌ ඒවා ගලවාගත්තේ පුදුම ආකාරයෙන්. ඇතැම්විට කොටියා තම වලිගය පවා උපයෝගී කරගන්නා ආකාරය මා දුටුවා. “
තම සිරුරේ ඇනී තිබූ සියලු ඉත්තෑකූරු මහත් වෙහෙසකින් ඉවත් කර ගත් කොටියා වනයට වැදී නොපෙනී ගිය බව ඡායාරූප ශිල්පියා පවසයි.
