අඟහරු ග්රහයා මත ගලායන ජලය තිබෙන බවට පැහැදිලි සාක්ෂි ලැබී ඇතැයි නාසා ආයතනය නිවේදනය කරයි. අඟහරු පිරික්සුම් යානය මගින් 2011 වසරේදී එවන ලද ඡායාරූප වල දක්නට ලැබුණු අඳුරු පැහැති ඇඟිලි වැනි සලකුණු දිගින් දිගටම විශ්ලේෂණය කිරීම මගින් ඔවුන් මෙම නිගමනයට එළඹී ඇත.
රතු ග්රහයාගේ පෘෂ්ඨයේ විවිධ ස්ථාන වල ශෛලමය බෑවුම් මත දිගින් හා අඳුරු පැහැයෙන් අඩුවැඩි වෙමින් වෙනස් වන රේඛා වරින් වර විද්යාඥයින් විසින් නිරීක්ෂණයට ලක්කැර ඇත. සෘතුමය වෙනස්වීම් හෝ උෂ්ණත්ව වෙනස්වීම් මත රේඛාවල දිග අඩුවැඩිවීම හා පැහැය අඩුවැඩිවීම සිදුවන බව ඔවුන්ට පෙනී ගොස් ඇත. රතු ග්රහයාගේ පෘෂ්ඨය මත හෝ පෘෂ්ඨයට යටින් ගලායන ද්රව මගින් මෙවැනි සලකුණු ඇතිවිය හැකි බවත් ලවණමය ජලය දියවී අගාධ තුළට ගලායාම නිසා රේඛාවල දිග අඩුවැඩි වීම සිදුවියහැකි බවත් ඔවුන්ගේ මතයයි.
අඟහරු මත ධ්රැවීය අයිස් පවතින බව මීට දශක කිහිපයකට පෙර සොයාගනු ලැබීය. වෙනත් ග්රහලෝකයක ජලය පවතින බවට සාක්ෂි ලැබුණ ප්රථම අවස්ථාව මෙය බව නාසා විද්යාඥයින් ප්රකාශ කරයි.
විශ්ලේෂකයින් පවසන්නේ මෙම දැවැන්ත විද්යාත්මක අනාවරණය අඟහරු මත ජීවය සොයා ගැනීම සම්බන්ධව ඉතා වැදගත් ඉදිරි පියවරක් බවයි.
