පෘථිවියේ ඔක්සිජන් මට්ටම ජීවය ආරම්භවීමට සුදුසු ආකාරයට පත්වූයේ මෙතෙක් සිතා සිටියාට වඩා බොහෝ පෙර කාලයක දී යැයි පර්යේෂකයන් විසින් තහවුරු කරගෙන ඇත. මෙතෙක් සිතා සිටියේ වසර බිලියන 2.4ට පෙර ජීවය ඇතිවීමට සුදුසු පරිදි පෘථිවි වායුගෝලයේ ඔක්සිජන් සංයුතිය ඇති වූ බවයි.

මේ පර්යේෂණය සිදුකැර ඇත්තේ ටෙනෙස්සී විශ්වවිද්‍යාලයේ ආචාර්ය රොබට් රයිඩින් විසිනි. මේ සඳහා අවශ්‍ය සාධක හමුවී ඇත්තේ කැනඩාවේ ඔන්ටෝරියෝ ප්‍රාන්තයේ ස්ටීප් රොක් ලේක් හි පිහිටි වසර බිලියන 2.8ක් පැරණි ගල් පර්වතයකිනි. පර්යේෂකයන් පවසන්නේ මේ ස්ථානය අතීතයේ නොගැඹුරු හුදකලා මුහුදක්ව පැවති බවකි. ඒ ප්‍රදේශය හුණුගල් වලින් නිර්මාණය වී තිබී ඇත. ඒ හුණුගල් වසර බිලියන 2.8 ක කාලක සිට නොවෙනස්ව පැවති බව සනාථ වී තිබේ.

හුණුගල් නිර්මාණය වීමට ඔක්සිජන් අත්‍යාවශ්‍ය සාධකයකි. එමගින් තීරණ්‍ය කළ හැකි වන්නේ අප දැන සිටින අතීතයට වඩා ඈතක සිට ඔක්සිජන් ජීවීන්ට සුදුසු ප්‍රමාණයකින් මිහිතලයේ පැවතුණු බවයි.

විද්‍යාඥයන්ගේ මතය වන්නේ පිරිසිදු ජලයෙන් ඔක්සිජන් ඇදගන්නා බැක්ටීරියාවක් ඔක්සිජන් ප්‍රභවය වන්නට ඇති බවයි.