අයර්ලන්තයේ ස්ලිගෝ නගරය ආසන්නයේ  පෙරළී ගිය ගසක මුල් අතර තිබී වසර 900ට පමණ පෙර සාහසික ඝාතනයකට ලක්වූ තරුණයකුගේ ඇටසැකිල්ලක් හමුවූ බව විදෙස් මාධ්‍ය වාර්තා කරයි.

මිනිස් ඇටසැකිලි මතුකරමින් පෙරළී ගොස් ඇත්තේ දැවැන්ත බර්ච් ගසකි. එහි මුල් පද්ධතිය සමග හිරවී මේ මිනිස් අස්ථි කොටස් ඉහළට පැමිණ ඇත.

පර්යේෂකයන් පවසන්නේ මෙය පැරණි සොහොනක් විය හැකි බවයි. කොදු ඇටපෙළ හා හිස ඇතුළු ඉහළ කොටස් ගසේ මුල් සමග ඉහළට එසවී ඇති අතර පාද ඇතුළු සිරුරේ පහළ කොටස් පොළොව මත තිබෙණු දක්නට ලැබී ඇත.

මේ සැකිල්ල සම්බන්ධයෙන් පර්යේෂණ කළ ස්ලිගෝ ජාතික සිහිවටන කෞතුකාගාරයේ ආචාර්ය මැරියන් ඩවුඩ් මහත්මිය පවසන්නේ මියගෝස ඇත්තේ අවුරුදු 17ත් 20ත් අතර තරුණයකු බව අස්ථි පරීක්ෂණයේ දී තහවුරු වූ බවයි. ඔහුගේ උස අඩි පහයි අගල් පහක් පමණ වන්නට ඇතැයි ද විශ්වාසයක් පවතී. එම අස්ථි කාල නිර්ණයේ දී පෙනී ගොස් ඇත්තේ ක්‍රිස්තු වර්ෂ 1030ත් 1200ත් අතර කාලයේ දී මොහු මියයන්නට ඇති බවයි. පෙරළී වැටුණු බර්ච් ගස වසර 250ට වඩා පැරණියැයි ද කියති.

මියගොස් ඇති තරුණයාගේ හිස් කබලේ සහ අතේ අස්ථිවල ඇති තියුණු කැපුම් තුවාල සළකුණු හේතුවෙන් ඔහු සාහසික ඝාතනයකට ගොදුරුවන්නට ඇතැයි ද පර්යේෂකයෝ කියති.

මරණයට හේතුව යුද්ධයක් හෝ පුද්ගලික ආරවුලක්දැයි ස්ථිරවම කිව නොහැකි වුව ද පැරණි තොරතුරු අනුව මේ ස්ථානයේ ක්‍රිස්තියානි ආගමික සිද්ධස්ථානයක් හා සොහොන් බිමක් තිබූ බවට සාධක ඇත. සිරුරේ හිස සහ පාද පිහිටා ඇති ආකාරය අනුව ක්‍රිස්තියානි විශ්වාසයන් පිරිදි නැගෙනහිරට හා බටහිරට සිටින ලෙස මේ තරුණයාගේ සිරුර මිහිදන් කැර තිබෙන්නට ඇතැයි ද ආචාර්ය ඩවුඩ් මහත්මිය පවසන්නීය.