- පක්ෂ විපක්ෂ මහජන නියෝජිත හමුවේදී ජනපති කියයි
අංජුල මහික වීරරත්න
විපතට පත් ජනතාවගේ ජීවිත ආරක්ෂා කර ගැනීම සහ ඔවුන්ට අවශ්ය සහන සැලසීම වෙනුවෙන් අසීරු අවස්ථාවේ සියලු දෙනා එක්ව කාර්යක්ෂමව කටයුතු කරමු යැයි ජනාධිපති අනුර කුමාර දිසානායක පක්ෂ විපක්ෂ මහජන නියෝජිතයන් හමුවේ පෙරේදා (28දා) පැවැසීය.
ජනාධිපතිවරයා මේ බව සඳහන් කළේ අයහපත් කාලගුණය හේතුවෙන් රටේ උද්ගතව ඇති හදිසි ආපදා තත්ත්වය හමුවේ ගත යුතු ඉදිරි ක්රියාමාර්ග පිළිබඳව සොයා බැලීමට පක්ෂ විපක්ෂ මහජන නියෝජිතයන් සමඟ ත්රිවිධ හමුදා ආරක්ෂක මූලස්ථානයේ පැවති සාකච්ඡාවට එක් වෙමිනි.
විපතට පත් ජනතාවට සහන සැලසීමේදී මුදල් කිසිදු බාධාවක් නොවන බව මෙහිදී සඳහන් කළ ජනාධිපති අනුර කුමාර දිසානායක ආපදා කළමනාකරණ දිස්ත්රික් කමිටු මේ වන විට කැඳවා තිබෙන අතර, දැනටමත් දිස්ත්රික් ලේකම්වරුන්ට අවශතාව පරිදි වැය කිරීමට මුදල් ප්රමාණයක් නිදහස් කර තිබෙන බව සඳහන් කළේය.
කිසිදු චක්රලේඛයක් එම මුදල් වැය කිරීමට බාධාවක් ඇති නොකරන බවත්, එසේ බාධාවක් වන අවස්ථා තිබේ නම් දිස්ත්රික් සම්බන්ධීකරණ කමිටුවේ එකඟතාව ඇතිව එම මුදල් වැය කිරීමට දැනුම් දී තිබෙන බවත් ජනාධිපතිවරයා පැවසීය.
මේ අතර සහන සේවා කණ්ඩායම්වලට ළගා විය නොහැකි ස්ථානවල සිරවී සිටින ජනතාව මුදා ගැනීම වෙනුවෙන් අවශ්ය හෙලිකොප්ටර් යානා යොමු කර ජනතාව මුදා ගැනීමේ කටයුතු සිදු කෙරෙන බවද සඳහන් කළ ජනාධිපතිවරයා ජනතාව මුදා ගැනීමේ කටයුතු සඳහා අවශ්ය නම් හෙලිකොප්ටර් පහසුකම් ලබා දීමට ඉන්දීය මහකොමසාරිස් කාර්යාලය මේ වන විට එකඟතාව පළ කර තිබෙන බව වැඩිදුරටත් සඳහන් කළේය.
ආරක්ෂිත කඳවුරු වෙත පැමිණ සිටින ජනතාව, තම නිවෙස්වල රැඳී සිටින ජනතාව සහ නිවාසවලින් පිට වෙනත් ස්ථානවල සිටින ජනතාව වෙනුවෙන් අවශ්ය පිසූ ආහාර, සෞඛ්ය පහසුකම් ඇතුළු සහන සේවා අඛණ්ඩව සැපයීම මේ වන විට සිදු කෙරෙන බව සඳහන් කළ ජනාධිපතිවරයා තම දිස්ත්රික්කවල සහන සේවා ළගා නොවන ස්ථාන තිබේ නම් ඒ පිළිබඳ වහාම ආපදා කළමනාකරණ මධ්යස්ථානය වෙත තොරතුරු ලබා දෙන ලෙසද මහජන නියෝජිතයන්ට දැනුම් දුන්නේය.
එමෙන්ම බස්නාහිර පළාතේ වර්ධනය වෙමින් පවතින අවදානම් සහගත තත්ත්වයට මුහුණ දීමට අවශ්ය වැඩසටහන් මේ වන විට සැලසුම් කර තිබෙන බවද ජනාධිපතිවරයා වැඩිදුරටත් පැවසීය.
මෙහිදී අදහස් දක්වමින් විපක්ෂ මන්ත්රීවරුන් යෝජනා කළේ මතුව ඇති අවදානම් තත්ත්වය සහ මුදා ගැනීමේ සහ සහන සේවා කටයුතු කාර්යක්ෂම කිරීම වෙනුවෙන් අවශ්ය නම් හදිසි නීතිය ක්රියාත්මක කරන්නට පූර්ණ සහාය ලබා දෙන බවයි.
තම දිස්ත්රික්කවල පවතින තත්ත්වය සහ අවශ්යතා පිළිබඳව මෙහිදී මහජන නියෝජිතයෝ වැඩිදුරටත් ජනාධිපතිවරයා දැනුම්වත් කළහ.
අග්රාමාත්ය ආචාර්ය හරිනි අමරසූරිය, විපක්ෂ නායක සජිත් ප්රේමදාස ඇතුළු සිංහල දෙමළ මුස්ලිම් සර්ව පාක්ෂික මහජන නියෝජිතයෝද, ජනාධිපති ලේකම් ආචාර්ය නන්දික සනත් කුමානායක, ආරක්ෂක අමාත්යාංශයේ ලේකම් එයාර් වයිස් මාර්ෂල් සම්පත් තුයියකොන්තා, මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම ඇතුළු අමාත්යාශ ලේකම්වරු සහ රාජ්ය නිලධාරීහුද, ත්රිවිධ හමුදාපතිවරු, පොලිස්පති ඇතුළු ආරක්ෂක අංශ ජ්යෙෂ්ඨ නිලධාරීහු ඇතුළු පිරිසක් මෙම අවස්ථාවට එක්ව සිටියහ.
