සිතුම් චතුරංග
වවුනියාව සේමමඩු රක්ෂිතයේ නීතිවිරෝධි අයුරින් බුරුත දැව කපා ප‍්‍රවාහනය කළ කැබ් රථයක් අද (5) වවුනියාව,නොච්චිමොටෙයි, සින්නකුලම ප‍්‍රදේශයේදී වවුනියාව ඕමන්ත පොලිස් ස්ථානයේ නිලධාරීන් පිරිසක් විසින් අත්අඩංගුවට ගනු ලැබීය.
නීතිවිරෝධී දැව ජාවාරමක් පිළිබඳ ඕමන්ත පොලිස් ස්ථානාධිපතිවරයා වෙත ලැබුණු තොරතුරකට අනුව සිදුකළ වැටලීමකදී බුරුත දැව කඳන් පැටවූ කැබ්රථය අත්අඩංගුවට ගත් බව පොලිසිය පවසයි.
වැටලීම සිදුකරන අවස්ථාවේ කැබ්රථයේ රියදුරු පලා ගොස් සිටි අතර කැබ් රථයේ තිබූ බුරුත දැව කඳන් තොගයේ වටිනාකම රුපියල් ලක්ෂ පහකට අධික බවද සඳහන් කළේය.
සැකකරුවන් විසින් සේමමඩු රක්ෂිතයෙන් කපන ලද බුරුත දැව කදන් කැබ් රථයක පටවා වවුනියාවේ ස්ථානයක් වෙත රැගෙනවිත් රහසිගත අයුරින් යාපනය ප‍්‍රදේශයට ප‍්‍රවාහනය කරන බවට තොරතුරු අනාවරණය වූ බවද පොලිසිය කියයි.
දීර්ඝ කාලයක සිට රක්ෂිත තුළින් බුරුත ගස් කපා ජාවාරම්කරුවන් නීතිවිරෝධී ලෙස දැව ප‍්‍රවාහනය කර ඇති බවද කීය.
