( ඔගස්ටින් ප‍්‍රනාන්දු )
පුත්තලම දිස්ත‍්‍රික් පාර්ලිමේන්තු මන්ත‍්‍රි ශාන්ත සිසිර කුමාර අබේසේකර මහතා විසින් අඹකඳවිල මීසම පාලනාධිපති පියතුමාට දේවස්ථාන භුමිය තුළදී තර්ජනය කරනු ලැබ ඇති බවට පැමිණිල්ලක් අද (26) ලැබුණු බව හලාවත පොලිසිය කියයි.
අඹකඳවිල ප‍්‍රදේශයේ සිදු කෙරෙන වැලි ඉවත් කිරිමක් මගින් සිදුවන මහ පරිමාණයේ පරිසර විනාශයකට එරෙහිව අලවා තිබු පෝස්ටරයකින් කුපිත වූ අදාළ මන්ත්‍රීවරයා විසින් එම විරෝධතාවේ නායකත්වය ගෙන කටයුතු කළ හලාවත පීටර් බොතේජු පියතුමා හමුවට ගොස් මෙලෙස තර්ජනය කරනු ලැබ ඇතැයි පැමිණිල්ලෙන් කියැවේ.
මේ අතර අදාළ මන්ත්‍රීවරයා විසින්ද හලාවත පොලිසියට පැමිණිල්ලක් කරනු ලැබ ඇත.
පෝස්ටර් ගැලවු බව කියමින් තමන්ගේ හිතවතුන් පිරිසක් ඊයේ ( 25) රාත‍්‍රියේදී අඹකඳවිල දේවස්ථානය කරා රැගෙන යනු ලැබ ඇති බව දැන තමන් පියතුමා සමග කතා බහ කර ඔවුන් කැඳවා ගෙන පැමිණි බව මන්ත්‍රීවරයාගේ පැමිණිල්ලේ දැක්වෙයි.
මේ සම්බන්ධයෙන් වැඩිදුර තොරතුරු දැන ගැනිමට මන්ත්‍රීවරයා සම්බන්ධ කරගැනීමට උත්සහ කළ නමුත් මන්ත‍්‍රිවරයා නඩු කටයුත්තක් වෙනුවෙන් පුත්තලම අධිකරණය හමුවට ගොස් තිබිණි.
මේ සම්බන්ධයෙන් දෙපාර්ශවය කැඳවා පරික්ෂණයක් කරන බව හලාවත මුලස්ථාන ප‍්‍රධාන පොලිස් පරික්ෂණ වසන්ත හේරත් මහතා කියයි.
