(අංජුල මහික වීරරත්න)
සමලිංගික විවාහ ලංකාවේත් ප්‍රචාරය කිරීම සඳහා යම් යම් සංවිධාන සහ ආයතන ඉදිරිපත් වී තිබෙන බව මැල්කම් කාදිනල් රංජිත් කොළඹ අගරදගුරු තුමෝ බේරුවල දී පැවසූහ.
මෙවැනි දේ මානව අයිතිවාසිකමක් යැයි කියමින් සිටින බව කී අගරදගුරු තුමෝ ඒවා මානව අයිතිවාසිකමක් වෙන්නේ කොහොමදැයි ප්‍රශ්න කළේය.
මැල්කම් කාදිනල් රංජිත් කොළඹ අගරදගුරු තුමන් මෙසේ කීවේ බේරුවල ශාන්ත ආනා දේවස්ථානයේ පැවති ආගමික වැඩසටහනකට එක්වෙමිනි.
එහිදී අගරදගුරු තුමෝ මෙසේද කීහ.
"අද තරුණ තරුණියෝ විවාහ ජීවිතය ගැන හරියට තේරුම් නොගෙන තමන්ගේ හැඟීම් වලට වහල් වී සහකාරයා හෝ සහකාරිය තෝරා ගැනීමේ කටයුත්තේ යෙදී තිබෙනවා. ඒ නිසා එය බොහෝ දුරට තාවකාලික අත්දැකීමක් පමණක් බවට විවාහ ජීවිතය හුරු වෙන්න පටන් ගෙන තිබෙනවා.
ඒ වගේම අද විවිධ දූෂිත ආකල්ප සමාජය තුළට ගලා එමින් පවතිනවා.පිරිමි -පිරිමි දෙන්නෙක් විවාහ වෙනවා.ගැහැණු- ගැහැණු දෙන්නෙක් විවාහ වෙනවා.විදේශ රටවල සමලිංගික විවාහ පවා සිදුවන තත්ත්වයකට පැමිණ ඇති නිසා ලංකාවෙත් මෙවැනි දේ ප්‍රචාරය කරන්නට යම් යම් සංවිධාන සහ ආයතන ඉදිරිපත් වෙලා තිබෙනවා.
මේක මානව අයිතිවාසිකමක් කියලා කියනවා.මේක මානව අයිතිවාසිකමක් වෙන්නේ කොහොමද?පිරිමි දෙන්නෙක් පවුලක් හදන්නේ කොහොමද?දරුවෝ ලබන්නේ කොහොමද? එදා ස්වාමිපුරුෂයා භාර්යාව පළමු වරට මුණ ගැසුණේ එක්කෝ සැමියාගේ ගෙදර. නැතිනම් භාර්යාවගේ ගෙදර.එදා මව්පියන් එකතුවෙලා කතා කරලා සිදු වෙච්ච විවාහ අද තියෙන තත්ත්වයට වඩා සාර්ථක විවාහ බවට පත්වෙලා තිබෙනවා.
ස්වාමිපුරුෂයෝ සහ භාර්යාවෝ තම තමන් යාළු වෙලා කසාද බැන්දාම ඒවා බිඳ වැටෙන අවස්ථා වැඩියි යනුවෙන්ද අගරදගුරු තුමෝ කීහ.
(ඡායා තුසිත කුමාරද සිල්වා)
