(අංජුල මහික වීරරත්න)
විපක්ෂ නායක සජිත් ප්රේමදාස මහතා තම බිරියට සහ සහෝදරයාට කතා කොට තමාට පක්ෂයෙන් යන්න දෙන්න එපා යැයි කන්නලව් කළ හඬ පට විපක්ෂ නායකවරයා කැමති නම් එළියට දැමීමට සූදානම් බව සමගි ජන බලවේගයේ හිටපු උප සභාපති පී. හැරිසන් මහතා මාධ්ය හමුවකදී පැවසීය.
හැරිසන් යනු සමගි ජනබලවේගයේ සිටි ඉරට්ටක් යැයි සමගි ජන බලවේගයේ මාධ්ය හමුවේ දී කෙරුණු ප්රකාශයක් සම්බන්ධයෙන් මාධ්යවේදියෙකු ඇසූ ප්රශ්නයකට පිළිතුරු දෙමින් හැරිසන් මහතා මේ බව සඳහන් කළේය.
සජිත් ප්රේමදාස මහතා තම බිරියට සහ සහෝදරයාට කතා කළ හඬ පට එලියට දැම්මොත් තමා ඉරට්ටක්ද පොල් ගහක් ද කියා තේරුම් ගැනීමට හැකි වනු ඇතැයි හැරිසන් මහතා සඳහන් කළේය.
දවසක් හෝ සජිත් ප්රේමදාස මහතා සමඟ තමා කටයුතු කළ නිසා එතුමාගේ අවසරයක් නැතිව හඬ පට එලියට දාන්න සූදානම් නැතැයි ද සජිත් ප්රේමදාස මහතා අවසරය දෙනවා නම් අදාල හඬ පටය එළියට දැමීමට සූදානම් යැයි පී. හැරිසන් මහතා වැඩිදුරටත් කීය.
(ඡායාරූපය: අංජුල මහික වීරරත්න)
