(යොහාන් භාසුර)
ශ්‍රී ලංකා නිදහස් පක්ෂයේ කොළඹ දිස්ත්‍රික් බලමණ්ඩලයේ සභාපතිවරයා ලෙස පාර්ලිමේන්තු මන්ත්‍රී, ජනාධිපති නීතිඥ ෆයිසර් මුස්තාපා මහතා තේරී පත්විය.
කොළඹ දිස්ත්‍රික් බලමණ්ඩලයේ ලේකම් ලෙස කෝට්ටේ ආසන සංවිධායක, කෝට්ටේ හිටපු නගරාධිපති ජනක රනවක මහතා ද භාණ්ඩාගාරික ලෙස හෝමාගම සංවිධායක ඉසුරු අබේවර්ධන මහතා ද තේරීපත්වූහ.
ශ්‍රී ලංකා නිදහස් පක්ෂ කොළඹ දිස්ත්‍රික් සංවිධානය සහ අනුබද්ධ සංවිධාන යාවත්කාලීන කිරීම එම පක්ෂයේ සභාපති නිමල් සිරිපාල ද සිල්වා මහතාගේ ප්‍රධානත්වයෙන් මරදානේ පිහිටි එම පක්ෂ මූලස්ථානයේදී පසුගිය ඉරිදා පැවැත්විණි.
එහිදී උප ලේකම්වරු ලෙස මොරටුව ආසනය සංවිධායක සුජිත් පුෂ්පකුමාර, කොලොන්නාව ආසන සංවිධායක සමන් වෙරළුපිටිය යන මහත්වරු පත්වූහ.
කාරක සභිකයන් ලෙස රොෂාන් කොළඹගේ, තුෂාර සංජීව, මහින්ද බණ්ඩාර, අනුර අතුකෝරාල, දීපා එදිරිසිංහ සහ කුමාරී පතිරිගේ යන මහත්ම මහත්මීහු තේරී පත්වූහ. සමස්ත රටම ආවරණය වන පරිදි සියලුම දිස්ත්‍රික් බල මණ්ඩලය සහ අනුබද්ධ සංවිධාන යාවත්කාලීන කිරීමට ශ්‍රී ලංකා නිදහස් පක්ෂ ප්‍රතිසංවිධාන වැඩපිළිවෙලක් ක්‍රියාත්මක කර තිබේ.
