(ෂේන් සෙනෙවිරත්න)
ජාත්යන්තර හෙද දිනය නිමිත්තෙන් සෞඛ්ය අමාත්ය කෙහෙළිය රඹුක්වැල්ල මහතා සහ සෞඛ්ය අධ්යක්ෂ ජනරාල් අසේල ගුණවර්ධන මහතා ප්රමුඛ සෞඛ්ය ක්ෂේත්රයේ ඉහළම නිලධාරීන්ගේ සහභාගීත්වයෙන් මහනුවර පොල්ගොල්ල මහින්ද රාජපක්ෂ ශ්රවණාගාරයේ අද (17) උදේ පැවති උත්සවයේදී එහි පැමිණ සිටි පිරිසකට පිළුණු වූ කෙටි ආහාර සමග තේ පැන් ලබාදී ඇතැයි වාර්තා වේ.
මහනුවර නගරයේ ප්රසිද්ධ හෝටලයකින් ලබාගෙන තිබූ එම කෙටි ආහාරවල තිබූ සැමන් දැඩි ලෙස පිළුණු වී ගඳ වහනය වෙමින් තිබූ අතර, මේ හේතුවෙන් එහි සිටි බොහෝ දෙනෙක් දැඩි අපහසුතාවට පත්වූහ.
මහජන සෞඛ්යය සම්බන්ධයෙන් කටයුතු කරන නිලධාරීන් පිරිසක් සිටින උත්සවයකදී ජනතාවගේ සෞඛ්යයට අහිතකර ආහාර ලබාදීම සම්බන්ධයෙන් එහි සිටි පිරිස් දැඩි විරෝධය දැක්වූ අතර, සිද්ධිය සමථයට පත්කිරීමට එහි සංවිධායක මණ්ඩලය දැඩි උත්සාහයක නිරත විය.
