(අංජුල මහික වීරරත්න)
මාතලේ දිස්ත්රික්කයේ ප්රාදේශීය ලේකම් කොට්ඨාස 11ක පවුල් 5501ක පුද්ගලයන් 11804ක් ආපදාවෙන් බලපෑමට ලක්ව සිටින බව නිලධාරීන් ජනාධිපති අනුර කුමාර දිසානායක මහතාට දැනුම් දුන්නේය.
මාතලේ දිස්ත්රික්කයේ ක්රියාත්මක සුරක්ෂිත මධ්යස්ථාන 44ක පුද්ගලයන් 4113ක් රැඳී සිටින අතර නිවාස 119කට පූර්ණ හානි සිදුව තිබෙන බවත් අර්ධ හානි සිදුවූ නිවාස ගණන 2618ක් බවත් නිලධාරීන් කීය.
ආපදා තත්ත්වය හේතුවෙන් බලපෑමට ලක් වූ මාතලේ දිස්ත්රික්කයේ ජන ජීවිතය යළි ගොඩනැඟීම සඳහා ජනාධිපතිවරයාගේ ප්රධානත්වයෙන් මාතලේ දිස්ත්රික් ලේකම් කාර්යාලයේ පැවති සාකච්ඡාවකදී මෙම කරුණු අනාවරණය විය.
ආපදාව හේතුවෙන් මාතලේ දිස්ත්රික්කයේ ප්රධාන මාර්ග 16ක් කැඩී ගොස් තිබු බවත් එයින් මාර්ග 12ක් පිළිසකර කර ගමනා ගමනයට විවෘත කර ඇති බවත් මෙහිදී නිලධාරීන් පෙන්වා දුන් අතර වත්තේගම - කන්දේගෙදර, උකුවෙල - ඇල්කඩුව, මොරගහකන්ද - වැල්ලවල, රත්තොට - ඉලුක්කුඹුර යන ඉතිරි මාර්ගද කඩිනමින් පිළිසකර කර විවෘත කරන බව මෙහිදී සඳහන් විය.
පළාත් මාර්ග 38කට දැඩි හානි සිදුව තිබෙන බවත්, 17කට අර්ධ හානි සිදුව තිබෙන බවත් මෙහිදී සඳහන් කෙරුණු අතර ඒ අතරින් මාර්ග 19ක් සම්පූර්ණයෙන් විවෘත කිරීමටත්, මාර්ග 19ක කොටසක් පමණක් විවෘත කිරීමටත් පියවර ගෙන ඇති බව නිලධාරීහු පෙන්වා දුන්හ.
ආපදා තත්ත්වය නිසා මාතලේ දිස්ත්රික්කයේ විදුලි සබඳතා 58ක් බිඳ වැටී තිබෙන අතර ඒවා කඩිනමින් යථා තත්ත්වයට පත් කර 92%කට පමණ විදුලිය ලබා දීමට මේ වන විට පියවර ගෙන තිබෙන බව ද සඳහන් විය.
ප්රවේශ මාර්ග අවහිර වීම සහ විවිධ ගැටලු හේතුවෙන් ප්රමාද වී ඇති රත්තොට, අඹන්ගඟ, ලග්ගල, උකුවෙල, යටවත්ත, පැල්ලේපොල, මාතලේ ආදි ප්රදේශවල විදුලි සබඳතා කඩිනමින් යථා තත්ත්වයට පත් කිරීමට කටයුතු කරමින් සිටින බවත් විදුලිබල මණ්ඩලයේ නිලධාරීහූ පෙන්වා දුන්හ.
එමෙන්ම දිස්ත්රික්කයේ බිඳ වැටුණු ජල සැපයුම යථාවත් කිරීම පිළිබඳවද මෙහිදී සාකච්ඡා කෙරුණු අතර ප්රවේශ මාර්ග අවහිර වීමෙන් පවුල් 500කට පමණ සතියක් පුරා පානීය ජලය අහිමි වී ඇති බව අනාවරණය විය.
