( තරිදු ජයවර්ධන)
ජනාධිපතිවරයා හිටපු ආරක්ෂක ලේකම්වරයා සහ සහකාර පොලිස් අධිකාරීවරයකු ඝාතනය කිරීමට කුමන්ත්‍රණය කළැයි කියන සිද්ධියක් සම්බන්ධයෙන් විමර්ශන පවත්වන අපරාධ පරීක්ෂණ දෙපාර්තුමේන්තුව අද (25) පොලිස්පති පුජිත් ජයසුන්දර මහතාගෙන් පැය හතරකට ආසන්න කාලයක් ප්‍රශ්න කර ප්‍රකාශ සටහන් කර ගත්තේය.
අපරාධ පරීක්ෂණ දෙපාර්තමේන්තුව කළ දැනුම් දීමක් අනුව අද (25) උදේ 7.30 ට පමණ පුජිත් ජයසුන්දර මහතා අපරාධ පරීක්ෂණ දෙපාර්තමේන්තුව හමුවේ පෙනී සිටි බවත් දහල් 11.30 පමණ වන තෙක් ප්‍රශ්නකර ප්‍රකාශ සටහන් කරගත් බවත් පොලිස් ආරංචිමාර්ග කියයි.
සිද්ධිය සම්බන්ධයෙන් වැඩිදුරටත් ප්‍රකාශ සටහන් කරගැනීම සඳහා තවත් දිනක පොලිස්පතිවරයා කැඳවීමට නියමිත බවද එම ආරංචිමාර්ග සඳහන් කරයි.
ජනාධිපති මෛත්‍රීපාල සිරිසේන ,හිටපු ආරක්ෂක ලේකම් ගෝඨාභය රාජපක්ෂ සහ සහකාර පොලිස් අධිකාරී ප්‍රසන්න අල්විස් යන මහත්වරුන් ඝාතනය කිරීමට කුමන්ත්‍රණය කළැයි කියන සිද්ධියක් සම්බන්ධයෙන් නාමල් කුමාර නැමැත්තෙකු අපරාධ පරීක්ෂණ දෙපාර්තමේන්තුවට පැමිණිල්ලක් කර තිබිණි. ඊට අදාල හඬපට කිහිපයක්ද ඔහු අපරාධ පරීක්ෂණ දෙපාර්තමේන්තුවට බාර දී තිබුණි.
පැමිණිල්ලෙන් පසු පරීක්ෂණ ආරම්භ කළ අපරාධ පරීක්ෂණ දෙපාර්තමේන්තුව මීට පෙර ත්‍රස්තවාදී විමර්ශන කොට්ඨාසය භාරව සිටි නාලක ද සිල්වා මහතා අත්අඩංගුවට ගත් අතර ඔහු මේ වන විට රිමාන්ඩ් බාරයේ පසුවේ.
ත්‍රස්තවිමර්ශන අංශයේ තිබු ස්වයංක්‍රීය අවි දෙකක් නිත්‍යනුකූල නොවන ආකාරයට ඉන් පිටතට ගෙන ගොස් යළි ගෙන ඒමේ සිද්ධියක් සම්බන්ධයෙන්ද මෙම පරීක්ෂණයේදී තොරතුරු අනාවරණය වී ඇති අතර ඒ ගැනද විමර්ශන පවත්වන බවද අපරාධ පරීක්ෂණ දෙපාර්තමේන්තුව පවසයි.
මෙම පරීක්ෂණයට අදාලව මේ වන විට ජ්‍යෙෂ්ඨ නියෝජ්‍ය පොලිස්පතිවරුන් දෙදෙනකු ,පොලිස් අධිකාරීවරු දෙදෙනකු සහ සහකාර පොලිස් අධිකාරීවරු ඇතුළු පොලීසයේ විශාල පිරිසකගෙන් ප්‍රශ්න කර ප්‍රකාශ සටහන් කරගෙන තිබේ.
