( +++ වතුපිටිවල එස්.යූ.ඩබ්ලිව්.කේ. ජයවර්ධන)
“නොදනිත් දරුවන් ඇකයෙන් වැටුණා” යන ගුත්තිල කාව්යයේ එන කවි පදය සජීවී අත්දැකීමක් බවට පත්වූ පුවතක් වතුපිටිවල රෝහලෙන් ඉකුත් 13 වැනිදා වාර්තා විය.
තරුණ අඹු සැමි යුවලක් පසුගිය 13 වැනිදා රාත්රියේ මාතලේ සිට කොළඹ බලා යමින් සිටියේ ත්රිරෝද රථයකිනි. ඔවුන්ගේ අවුරුදු 8ක් පමණ වන දරුවා ද මාස හතක් වන බිලිඳා ද ඔවුන් සමග වූහ. මාස හතේ බිලිඳා මවු ඇකයේ තද නින්දක වැටී සිටියේය. ත්රිරෝද රථය පියා විසින් පදවා ඇත.
කතාබහකින් තොරව පියා ත්රිරෝද රථය පැදවූයේ බිරිය ද නින්දට පත්ව සිටි හෙයිනි. එක් අවස්ථාවක දී පියා බිරිය හා දරු දෙදෙනා දෙස බැලූ විට දැක තිබෙන්නේ බිරියගේ තුරුලෙහි සිටි බිලිඳා නොමැති බවය. වහා ත්රිරෝද රථය නතර කළ සැමියා බිරිය අවදිකර බිලිඳා ගැන විමසා තිබේ. එහෙත් බිලිඳාට වූ දෙයක් ඒ මව දැන සිටියේ නැත.
ත්රිරෝද රථය හරවා ගත් පියා මග දෙපස බලමින් හා මග දෙපස සිටි මිනිසුන්ගෙන් විමසමින් කිලෝමීටර 6ක පමණ දුරක් පැමිණ ඇත. මහ මග වැටී සිටි බිලිඳකු වතුපිටිවල රෝහලට රැගෙන ගිය බව ඔවුන්ට ප්රකාශ කළේ මග රැඳී සිටි මිනිසෙකි. ඒ තිහාරිය ප්රදේශයේදීය. මව්පිය දෙදෙනා වහා වතුපිටිවල රෝහලට ගියහ. මහ පාරේ වැටී සිටි දරුවා තමන්ගේ යැයි එම මවුපිය දෙපළ රෝහල් කාර්ය මණ්ඩලයට පවසා ඇතැයි නිට්ටඹුව මූලස්ථාන පොලිසියේ නිලධාරියෙක් පැවසීය.
ධාවනය වූ ත්රිරෝද රථයෙන් ඇද වැටුණද දරුවා සීරීම් තුවාල පමණක් ලබා තිබීම හාස්කමක් යැයි ප්රකාශ කළේ නිට්ටඹුව මූලස්ථාන පොලිසියේ ස්ථානාධිපති ප්රධාන පොලිස් පරීක්ෂක අනුර ගුණවර්ධන මහතාය. බිම වැටුණු දරුවා වෙනත් වාහනයකට යට නොවීම හාස්කමකින් වෙනස් නොවන්නකි.
දරුවකු කෙඳිරි ගාන ශබ්දය ඇසී ඒ දෙස විපරම් කිරීමේ දී බිම වැටී සිටි දරුවා දැක වහාම වතුපිටිවල රෝහලට දරුවා රැගෙන ගොස් බාර දී තිබෙන්නේ නිට්ටඹුව - තිහාරියේ ටයිල් අලෙවිසලක සේවය කරන මොහොමඞ් යුසුප් මොහොමදු නමැති තරුණයෙකි. අනවශ්ය කරදරයක් ඇඟට දා ගැනීමකැයි සිතා මෙබඳු අවස්ථා මගහැර යන මිනිසුන් සිටින රටක එම මුස්ලිම් ජාතික තරුණයා අගනා ආදර්ශයක් සමාජයට ලබා දුන්නේය.
මෙම මව්පිය දෙපළ මාතලේ සිට කොළඹ බලා පැමිණ ඇත්තේ ආගමන විගමන කාර්යාලයට යාමට යැයි නිට්ටඹුව මූලස්ථාන පොලිසිය පවසයි. තමන් තද නින්දට පත්වීම නිසා දරුවා බිම වැටෙනු නොදැනුන බව එම අම්මා කඳුළු පිරි දෙනෙතින් පොලිස් නිලධාරින් හමුවේ පවසා ඇත.
