(විමුක්ති එස් රුද්රිගු)
මෙරටට ලබාදෙන ඇමෙරිකානු ඩොලර් බිලියන 2.9 ක ණය මුදල සඳහා අනුමැතිය ලබා දීම රඳා පවතින්නේ ශ්රී ලංකාව තම ද්වි පාර්ශ්වික ණය හිමියන්ගෙන් මූල්ය සහතික ලබා ගැනීම මත බව ජාත්යන්තර මූල්ය අරමුදල ප්රකාශ කර ඇත.
ශ්රී ලංකාව තම නිල ද්වි පාර්ශ්වික ණය හිමියන් සමඟ අවශ්ය මූල්ය සහතික ලබා ගැනීම සඳහා සාකච්ඡා කරමින් සිටින බවත් එසේම ශ්රී ලංකාව අවශ්ය දේශීය ප්රතිසංස්කරණ ක්රියාත්මක කරමින් සිටින බවත් ජාත්යන්තර මූල්ය අරමුදලේ ණය මුදල ලබා ගැනීම සඳහා යෑමේදී ශ්රී ලංකාව ලබා ඇති ප්රගතිය සම්බන්ධයෙන් ප්රකාශයක් නිකුත් කරමින් එහි ප්රකාශකයෙකු පවසා ඇත.
ශ්රී ලංකාව ප්රමාණවත් මූල්ය සහතික ලබා ගත් සැණින් සහ අනිකුත් අවශ්යතා සැපිරූ සැණින් ණය මුදල ලබා ගැනීමට විධායක කමිටුවේ අනුමැතිය ලබා ගැනීම සඳහා යොමුකළ හැකි යැයි එම ප්රකාශයේ දැක්වේ.
පැරිස් සමාජය සහ ඉන්දියාව මේ වන විට නිල වශයෙන් ශ්රී ලංකාවට ණය මුදල ලබා ගැනීම සඳහා සහාය ලබා දෙමින් ජාත්යන්තර මූල්ය අරමුදලේ නිර්දේශ වලට අනුව ණය ප්රතිව්යුහගත කිරීමට කැමැත්ත ලබා දී ඇත.
ජාත්යන්තර මූල්ය අරමුදලේ ණය මුදල ලබා ගැනීම තුළින් ශ්රී ලංකාවේ විදෙස් සංචිත ඉහළ දමා ගැනීමටද අවස්ථාවක් හිමිවේ.ශ්රී ලංකාවේ ඇමෙරිකානු ඩොලර් බිලියන 50 ක් පමණ වූ බාහිර ණයෙන් ඇමෙරිකානු ඩොලර් බිලියන 10 ක් චීනය, ජපානය සහ ඉන්දියාව අතර බෙදී යයි.
