සමාජයේ බලය, ධනය හා සම්බන්ධතා යනාදියෙහි අසමතුලිතභාවය, දෙමාපියන් ඉතා කාර්යබහුල ජීවතයක් ගත කිරීම, නීතිය ක‍්‍රියාත්මක නොවීම නිසා ඉහල තලයන්හි වැජඹෙන දූෂිතයන්ගේ අකටයුතුකම් හා මාපිය සරණ අහිමිවී නෑදෑයින් අතට පත්වීම, වැනි කරුණු ශ්‍රී ලංකාවේ පසුගිය කාලයේ පුරා වාර්තා වූ කාන්තා හා ළමා දූෂණ වලට හේතු වී ඇති බවත් ඒවා අතුරින් සියයට අසූවක්ම සිදුවීම් වයස අවුරුදු දහසයට අඩු දැරියන් කෙළෙසීම හා විවිධ අපචාර වලට ලක්වීම සම්බන්ධයෙන් වන ඒවා බවත් පීඩා විඳින්නන්ට යුක්තිය සංවිධානයේ විසාකා තිලකරත්න මහත්මිය කියයි. මෙවැනි සිද්ධි පිළිබඳව දැඩි හඬක් නැගීම, ළමයි සියල්ලෝම අප සැමගේය යන හැඟීම වර්ධනය කර ගැනීම, තම දූ දරුවන් ගැන දැඩි අවධානයකින් සිටීම, නිවසින් පටන්ගෙන කාන්තාවන්ට හා දරුවන්ට සුරක්ෂිත පරිසරයක් ගොඩ නැගීම යන කරුණු ක‍්‍රියාවට නැංවීමෙන් අපචාර කටයුතු වලට පෙළඹෙන්නන් ඉන් වළක්වා ගත හැකිවනු ඇතැයි ඇය පවසති.