(සුජිත් හේවාජුලිගේ )

කොවිඩ් අවදානම හේතුවෙන් පාර්ලිමේන්තුවේ මුලුතැන්ගෙය සහ එහි ආපන ශාලා සියල්ල අද  සිට හදිසියේම වසා දමනු ලැබීය.

මේ හේතුවෙන් පාර්ලිමේන්තුවේ නිලධාරීන්ට සහ සේවකයන්ට කෑම පිටතින් ගෙන ඒමට තාවකාලිකව අවසර දුන් බව වේත්‍රධාරී නරේන්ද්‍ර ප්‍රනාන්දු මහතා පැවැසීය.

කෑම බීම පාර්ලිමේන්තු සංකීර්ණයට ගෙන ඒමට පෙර ඒවා දැඩි පරීක්ෂාවට ලක් කරන ලෙසට ආරක්ෂක අංශවලට උපදෙස්දී ඇතැයිද හෙතෙම සඳහන් කළේ‍ය.

පාර්ලිමේන්තු මන්ත්‍රීවරුන්, පාර්ලිමේන්තු සේවකයන් සහ මාධ්‍යවේදීන් ඇතුළු 275 දෙනෙකු පාර්ලිමේන්තු සංකීර්ණයේදී රැපිඩ් ඇන්ටිජන් පරීක්ෂණවලට පෙරේදා (17)යොමු කෙරුණු අතර ඉන් සේවකයන් දොළොස් දෙනෙකුට කොවිඩ් ආසාදනයවී ඇතැයි එම පරීක්ෂණවලදී හඳුනා ගැනිණ.

ඒ පිරිසේ ආපනශාලා අංශයේ සේවකයන් කිහිප දෙනෙකුද සිටිතියි පාර්ලිමේන්තු ආරංචි මාර්ග සඳහන් කරයි.

පාර්ලිමේන්තුව මීළඟට රැස්වීමට නියමිතව ඇත්තේ ලබන මස 6 වැනිදාය.

මේ අතර කොවිඩ් අවදානම් තත්වය සැලකිල්ලට ගෙන පාර්ලිමේන්තුවේ රාජකාරි කටයුතු සඳහා සේවකයන් ඉතා සීමිත වශයෙන් කැඳවීමට පාර්ලිමේන්තු මහ ලේකම් ධම්මික දසනායක මහතා තීරණය කර ඇත.

කොවිඩ් අවදානම හේතුවෙන් මේ සතියේ පාර්ලිමේන්තුව රැස්වූයේද පෙරේදා(17) දිනයේ පමණකි.