‘පසුගිය කාලයේ තිබුණා කතාවක් මගේ කකුල් කැපුවා, ඇගිලි කපනවා කියා. මේ මනුස්සලෝකේ මා ඉන්නතුරු එමෙහ අකරතැබ්බ නොවන බව මා දන්නවා. මට පෙර අකුසල් නෑ. කුසල් තිබෙන්නේ. මොන පක්ෂෙ වුණත් හොඳ දෙයක් යෝජනා කරනවා නම් අපි කරනවා. අපි දේශපාලන හතුරෝ නොවෙමු. මිතුරන් වෙමු. දරුවන්ටත් කියන්නේ වෛරයෙන් වෛරය ඇති කර ගන්න එපා. බුදු හාමුදුරුවන් උගන්වපු මෛත්රිය හැම තැනම තියනවා. ක්රිස්තුස් වහන්සේ ප්රේම කරන්න කියා තිබෙන්නේ මෛත්රිය තමයි. ‘ යැයි මහජන සම්බන්ධතා ඇමැති මර්වින් සිල්වා මහතා කැලණිය ශ්රී සුමංගල මහා විද්යාලයයේ නව මහින්දෝදය තාක්ෂණික විද්යාගරයට මුල් ගල තැබීමේ උත්සවයේ දී අද පැවසීය.
එක්සත් ජාතික පක්ෂ බස්නාහිර පළාත් සභා මන්ත්රී යු ජෝර්ජ් පෙරේරා මහතා ද එම අවස්ථාවට පැමිණ සිටියේය.
‘ අවුරුද්දයි දවස් 12ක් මා කැලණියේ හිටියේ නෑ. මං මිනී මැරුවයි කියා ප්රසිද්ධ කළා. එක්තරා ඝාතනයකට මා සිරගත කරන්න කියා එක්තරා පිරිසක් කිව්වා. මං අද හෙට උසාවි යනවා. කැලණිය සංවිධායකයා මිනී මැරුවා කිව්වාම රටේ ජනතාව හිතන්නේ මේ පුණ්ය භූමියේ ඉන්නේ මිනීමරණ පිරිසක් කියා. මට ගෞරවය ඕනේ නෑ. නමුත් ජනතාව වෙනුවෙන් මා අධිකරණය යනවා. කැලණිය මහා නායක හාමුදුරුවන්ගේ ඉඳලා හැමෝ දන්නවා මා කරන සේවය.
මම කැලණිය දාලා යන්නේ නෑ. කැලණිය දාලා යනවනම් යන්නේ ගෙදර. කැලණියෙන් තමා මා නැවතත් පාර්ලිමේන්තු යන්නේ කියන පණිවිඩය මම දෙනවා. කිරි දුන්නු අම්මාගේ දෙතන හපා කන්නෙත් නෑ. බත් දුන්නු තාත්තාගේ අත හපා කන්නෙත් නෑ. උපන් පළාත අමතර කරන්නෙත් නෑ. මට මේ පුටුව දුන්නු ගම්පහ ජනතාව අමතක කරන්නෙත් නෑ.
මේ කැලණියේ ප්රාදේශීය සභාව ගැන මා වග කියන්නේ නෑ. මට ඉන්නේ මන්ත්රීවරුන් හතර දෙනයි. දැන් ඩෙංගු නිසා කැලණියේ ගොඩක් මැරෙනවා. මා ඉන්න කාලේ මැරුණේ නෑ. එකක් වෙද්දිම මා දඩුවම් දුන්නා. ඒ කියන්නේ මා ගස් බැන්දේ නෑ, එයාලා කරලා පෙන්නුවා. මගේ ඉල්ලීම පිට තමයි කළේ. මං කිව්වා ඔයා බැඳ ගන්න, ඔයා ලියා ගන්න කියා. මා ගස් බඳින්නේ නෑ. එකවරක් කසාද බැන්දා විතරයි.‘
