හිඟු‍රානේ නවරත්න සමරතුංග
අත දරුවෙකු කරපින්නා ගෙන මහ රෑ පැමිණි කාන්තාවකට උපකාර කරන්නට ගොස් අකරතැබ්බකට මුහුණ පෑ තරුණයෙකු පිළිබඳ පුවතකි මේ.
සිද්ධිය මෙ‍සේය.
එක්තරා නිවසක නිවැසියන් සියලු දෙනා අලු‍ත් අවුරුද්දට පෙර දින (12) පවුලේ අවශ්‍යතාවක් මත පිටස්තර ප්‍රදේශයකට ගොස් ඇති අතර ඔවුන් එනතුරු එම නිවස රැක බලා ගැනීමට තරුණයෙකුට භාරදී තිබිණි.
ඒ අනුව මෙම තරුණයා එදින රාත්‍රි 10ට පමණ නිවසේ ආලින්ද‍යේ සිටින විට කිසිවකු එම නිවස ඉදිරිපිට පාරේ එමින් සිටිනු දැක ඒ ගැන විමසිලිමත් වී ඇත.
විදුලිපහන් කණුවක් අසලින් පැමිණි රුව ඔහුට සමීප වෙත්ම එසේ පැමිණියේ අත දරුවෙකු රැගෙන එන කාන්තාවක බව හඳුනා ගත්තේය.
ඇය දුටු ඔහු “මේ මහ රෑ යන්නේ කොහේදැයි” ඇයගෙන් ප්‍රශ්න කරන්නට විය.
එවිට කාන්තාව “අනේ මල්ලි‍යේ මට ලොකු කරදරක්වෙලා. මම බැඳපු මනුස්සයා ඉන්න තැන හොයාගෙන තමයි මේ යන්නේ” යැයි කීවාය.
එහිදී තවදුරටත් ඇතිවූ සංවාදයේදී මෙම කාන්තාවගේ සැමියා අධික ලෙස මත්පැනට ඇබ්බැහි වී සිටින අයෙකු බවත් ඔහු රාත්‍රි කාලයට මෙම ප්‍රදේශයේ කිසියම් නිවසක බීමත්ව රැඳී සිට පාන්දර ජාම‍යේ නිවසට එන බැවින් ඒ ගැන සෝදිසි කිරීමට මෙසේ යන බවද ඇය සඳහන් කළාය.
සිය දුක් ගැනවිල්ල තවදුරටත් ඔහුට පැවසූ ඇය හැකි නම් උදව්වක් හැටියට එම ගෙදරට තමන් ඇරලවන ලෙසද බැගෑපත්ව ඉල්ලීමක් කළාය.
මෙහිදී කාන්තාවගේ ඉල්ලීම ඉටු කිරීමට තරුණයාගේ හදවත උණුවී ගොස් එම නිවසේ තිබුණ යතුරුපැදිය පණගන්වා ඇය සහ දරුවා පිටු පස අසුනේ තබා‍ගෙන අදාළ නිවසට ගොස් බැලූවිට ඔහු එහි නොසිටි බව අනාවරණය විය.
ඉන් පසුව ඔහු වෙනත් නිවසක සිටී දැයි සොයා බැලු‍වත් එහිද ඔහු නොසිටි බැවින් කාන්තාව තරුණයා අමතා “අනේ මල්ලි කරපු උදව්වට ඔයාට ගොඩක් පින්! පුළුවන් නම් මේ දරුවයි මමයි අපේ ගෙදරට ගිහින් දාන්නැයි” ඉල්ලීමක් කර ඇත.
මහ වැස්සක පෙර නිමිති පහළ වී තිබුණ එම අවස්ථාවේ ඔහු ඇයට අනුකම්පා කර ඇයගේ නිවසට අරලවා ඇත.
එසැණින් ගෙට ඇතුළු වූ ඇය “දඩාස්” ගා දොර වසාගත් බැවින් ඔහු ටික වෙලාවක් මිදුලට වී කල්පනා කරමින් සිට ආපසු එන්නට විය. ටික දුරක් එද්දී යතුරුපැදියේ ඉන්ධන ඉවරවී තිබුණි.
ඉන් පසුව පැමිණි මහ වැස්සකට හසුවූ ඔහු කි‍ලෝ මීටර් තුනක් දුර යතුරුපැදිය තල්ලු කරගෙන අලු‍යම 2.00 ට පමණ එම නිවසට පැමිණි බව කියති.
ඒ වනවිට බැහැරක ගොස් සිටි නිවැසියන් ආපසු පැමිණ සිටි බැවින් ඔහු ඔවුන්ට පවසා ඇත්තේ තමන් “මෝහිනී” දැක ඒ පසු පසු කනත්ත දක්වා ගමන් කළත් අන්තිමේදී නොපෙනී ගිය බවට බේගලයකි.
එහෙත් පසුවදා ඔහු තම විශ්වාස වන්ත මිතුරෙකුට පවසමින් “අහක යන නයි රෙද්ද අස්සේ දාගෙන” තමන් ලොකු පරිප්පුවක් කෑ බව පවසා ඇත.
