ඈත අතීතයේ ප්‍රසිද්ධ කියමනක් වන ‘‘අපේ තාත්තා අටුවේ නැහැ” යන කියමන සිහිපත් කරමින් ඒ හා සමාන කතා පුවතක් එක්තරා ප්‍රදේශයක පාසලකින් වාර්තා විය.
අටුවේ කතාව ගෙතුණේ පොලිසියෙන් වරදකරුවකු වූ පුද්ගලයෙක් තමා සොයා ගෙදරට එන පොලිස් නිලධාරීන් දැක දිව ගොස් අටුවේ සැඟවෙන ගමන් පුතේ මම අටුවේ ඉන්න බව කියන්න එපා යැයි තම පුතාට පැවසීය. පොලිස් නිලධාරීන් නිවසට විත් පියා පිළිබඳ විමසන විට දී පුතා ‘‘අපේ තාත්තා අටුවේ නැහැ” යැයි පැවසීය.
මේ හා සම වූ සිද්ධිය සැකෙවින් මෙසේය.
පාසලේ ශ්‍රමදානයක් පැවැත්වීමට කැත්තක් උදැල්ලක් ගෙන මවුපියන්ට පාසලට පැමිණෙන ලෙස විදුහල්පතිවරයා සිසුන් දැනුවත් කළේය. අදාළ දිනයේ බහුතරයක් පිරිස පැමිණ සිටි බැවින් ශ්‍රමදානය සාර්ථකව සිදු කෙරුණි.
එහෙත් පසුදින නොපැමිණි මවුපියන්ගේ වාර්තාවක් ලබාදෙන ලෙස විදුහල්පතිවරයා පන්තිභාර ගුරුවරුන් දැනුවත් කර ඇති අතර එහිදී ගුරුවරිය නොපැමිණි මාපියන්ගේ දරුවන් කැඳවා නොපැමිණීමට හේතු විමසන්නට විය.
එහිදී එක සිසුවෙක් ‘‘ටීචර්, මම ගෙදර ගිහින් කිව්වා. ඊට පස්සේ අපේ තාත්තා කිව්වා ඔයාට ශ්‍රමදානයට එන්න කියලා කියන්න අමතක වුණා කියන්න” යැයි පැවසීය.
හේතු ඇසූ ගුරුතුමිය සිනාවේවීම විදුහල්පතිවරයා වෙත ගොස් සිදුවීම පිළිබඳ පැවසූ බව දැනගන්නට ලැබුණි.
මැදගම වාර්තාකරු
