තාත්තා අමුතුම තාලෙට රොටී ආහාරයට ගෙන ඇති ආකාරය දුටු දියණිය පුදුම වූ පුවතක් යාපහුව අවට ගමකින් අසන්නට ලැබුණි.
සිද්ධිය මෙසේය.
විවාහක සැමියාගේ බිරිය විදේශ රටකට ගොස් ඇත්තේ ගෘහ සේවිකා තනතුරකටය.
ඒ වැඩිමල් දියණියක හා බාල පුතෙකුගේ අධ්‍යාපනය වෙනුවෙන් සවියක් දීමට හා නිවසේ තිබෙන අඩුපාඩු සපුරා ගැනීම සඳහාය.
බිරිය රට යෑම නිසා ස්වාමියාට නිවසේ දරුවන් රැක බලා ගැනීම පැවරී ඇති අතර, ඔහුද ගොවිතැන් කටයුතු වෙනුවෙන් කැපවන්නෙකි.
උදේ සිට රෑ වනතුරු කුඹුරේ වැඩ කරන ඔහු ගෙට ගොඩවනවිට වැඩිමල් දියණිය ගේදොර වැඩපල සියල්ලක් කර තිබෙන්නේ අධ්‍යාපන කටයුතුවල නියැළෙන අතරවාරයේය.
තම පියා නිවසට පැමිණෙන ඇතැම් අවස්ථාවල දී මත් වතුර තොල ගෑම ද පුරුද්දක් කරගෙන තිබේ.
දිනක් පියා පදම ඉක්මවා ගොස් ගෙට පැමිණියේය.
දියණිය හා පුතා ඔහු එනවිට නින්දේ සිටියහ.
ඔවුන්ට කතා නොකළ පියා කුස්සියට ගියේ තම දුව උයා ඇත්තේ මොනවාද කියා සොයා බැලීමටය.
දුව පාන් පිටි රොටී හදා තිබෙන අයුරු ඔහු දුටුවේය.
රොටිය මතට කට්ට සම්බෝලය දමා එය තවත් බඳුනකින් වසා තිබුණේ පියාට කෑමටය.
ඒ අසල වාඩි වූ ඔහු එය අනුභව කර නින්දට ගියේය.
දුව උදේ කෑම සූදානම් කරන්නට නැගිට කුස්සියට ගියාය.
පිඟන් රාක්කයේ පෝලිමට තබා ඇති පිඟන් අතරේ රොටියද විය. රොටිය අතට ගත් දුව තාත්තාගෙන් ඒ ගැන විමසීමක් කළාය.
පදම ඉක්මවා සිටි පියා කට්ට සම්බෝල පමණක් ගිල දමා රොටිය පිඟාන යැයි සිතා එය පිඟන් රාක්කයෙන් තබා ඇති බව දියණිය වටහා ගත්තාය.
ඉන් ලැජ්ජාවට පත් පියා තමන්ට වූ සිදුවීම තම මිතුරන්ට පැවසීමෙන් සිද්ධිය දැන් මුළු ගමටම රහසක් නෙවෙයිලු.
මොරගොල්ලාගම සිසිර කැලේගම
