(තිහගොඩ - උපසේන ලියනගම)
කඳුකර ප්රදේශයේ සිට මාතර බලා දිවෙන පෞද්ගලික බස් රථයකි. අතරමගදී බසයට නැග්ගේ යුරෝපීය ඇඳුමෙන් සැරැසුණු රූමත් ලලනාවන් දෙදෙනෙකි. ඔවුන් බසයට නැගීමත් සමගම මුළු බසයම සුවඳවත් වූයේ ඔවුන් ආලේප කර තිබූ සැර සුවඳ විලවුන් නිසාය.
ඊළඟ බස් නැවැතුමේදී උපකාරක පන්තිවලට යනවා යැයි සිතිය හැකි තරුණ ගැටවරයන් තිදෙනකු බසයට නැග ගත් අතර එක් තරුණයකු යට කී තරුණියන් අසල නැවැතී අනෙක් අයට කීවේ ‘මාර සුවඳක් බං, උඹලත් මෙතෙනට වරෙල්ලා’ කියාය. ඒත් ඔවුහු එහි නොපැමිණි අතර මේ ගැටවරයා, ‘කොහෙන් හොයා ගත් සුවඳක් ද මන්දා... මාර සනීපයි...’ ආදිය කියමින් ඔච්චම් කරන විට එක් තරුණියක් කෝපයට පත්ව ඔහු දෙස හැරී වේගවත් කුඩ පහරක් එල්ල කොට වෙනත් ආසනයකට ගියාය.
මෙය මුල සිටම බලා සිටි කොන්දොස්තර මොහොතින් ලජ්ජාශීලීව සිටින ඔහු දෙසට විත් ‘මල්ලි සනීපේ සැප ද’ ඇසූවෙන් සෙසු මගීන් ඔහු දෙස බලා සිනාසෙන විට බසයේ පසුපසට ගිය ඔහු සීනුව නාද කොට බසයෙන් බැස්සේ යහළුවන් දෙදෙනාටත් නොකියාලු.
