කරන්දෙණිය එම්.සුසිල් ප්‍රියන්ත
බටහිර රටක සිට පැමිණ බටහිර ක්‍රමයට ආචාර සමාචාර කරන්නට ගොස් සිරුරේ පිටුපස සිදුරු කරගත් කතක ගැන කතාවක් දකුණේ ගමකින් අසන්නට ලැබේ.
බටහිර රටක වසර ගණනාවක් සේවය කළ ඇය ගමරට පැමිණියේ මේ ඊයේ පෙරේදාය. බටහිර රටක සිට පැමිණි ඇය සිය ශරීර සෞඛ්‍ය ආරක්ෂා කර ගැනීමේ අරමුණෙන් උදේ පාන්දරම පාරට බැස්සේ පොඩ්ඩක් ඇවිද ගෙන යාමටය. මේ අතර අසල්වාසී කතක්ද සුනඛ සුරතලා සමග පාරට බැස්සේ සුනඛයාට චූ පාරක් දැමීමටය.
බටහිර රට සිට පැමිණි ඇයට අසල්වාසී හිතවතිය දුටු ගමන්ම සතුට ඉහවහා ගියේය. ඒ එක්කම හායී ඩාලින් කියා ඇය හිතවතියගේ බෙල්ල බදාගෙන බටහිර රට ක්‍රමයට සිප වැළදෙගෙන ආචාර සමාචාර කිරීමට සැරසුණා පමණය. මෙම දර්ශනයෙන් අන්දමන්ද වූ සුනඛ සුරතලා ඇයගේ පසු පසට පැන එය ස්පර්ශ කළේ බලු දත් තුන හතරක් එහි සිටින ආකාරයටය. ඒ සමගම පශ්චාත් භාගයෙන් ලේ විදීමට පටන් ගත්තේ බලු දත්වලින් සිදුවූ තුවාලවලිනි.
ඇයි ඩලා සපන ඩෝග් කෙනෙක් එක්ක එළියට ආවේ ආයි ඉන්න බැහැ රිදෙනවා යයි කියමින් ඇය කෑමොර දෙමින් කීවාය.
අනේ නෑ අනේ මූ කවදාවත්ම කෙනෙක් හපලා නැහැ. මූ බය වෙන්න ඇති ඔයා මට කරදරයක් කරනවා යැයි කියමින් ඇය කීවේ ඇයගේ හිත හදන්නත් එක්කය.
අනේ ඩලා මම දැන් කොහොමද මේ ලේත් එක්ක වෝක් කරන්නේ කියමින් ඇය හිතවතියගේ නිවෙසට රිංගා ගත්තේ පස්සා පැත්තේ බලු දත්වලින් එන ලේ පිස ගැනීමටය.
